Гатун марф

Гатун ц1иг я, няни бере къвазва марф,
Таран к1аник ярдихъ галаз тек я зун.
Рик1 секин я, чи мецерал къвезвач гаф,
Т1ебиатди са суьгьуьрда тунва чун.

Каспидилай къарагъайла серин гар
Пешерилай аватзава ст1алар.
Гьар сад са Рагъ жезва чк1из агъзур зар
Ярдин чинал марфадикай хтарар.

Лугьузва чаз къе марфади манияр
Чи рик1ерин секинвилиз зил кьуна.
Мвегъуьн тарак агалтнава к1ани яр
Зи вилерин ц1ай-ялавра  вил туна.

Яваш-яваш ат1узва марф, са мах тваз
Хурушумдин мич1 гьатнавай чуьллера.
Ингье, са гъед хъуьрезва чаз дамах гваз
Чи муьгьуббат сейли ийиз эллера.

Куьлуьз-куьлуьз камар вегьиз хъфизва
Зи рик1ин пад, зи вилин хад - масанди.
Гатун марфад(и) ст1ал-ст1ал кхьизва
Ц1ийи ц1ар чи  к1анивилин дастандин!

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.