Л

Лам кири я, кицI ришвет.
Лам гатаз тахьайла алухар гатада.
Ламра ирид лашуниз сад лугьуда.
Лам текьенмаз хам хтIумир.
Лам парцин патав тухуз тахьайла, пар ламран патав твах.
Лам чIехи хьана алух гъвечIи.
Лам чIехи жеда, тевле ваъ.
Ламра жанавур кьур хьтин кар хьана.
Ламрал акьахна, балкIандив ахгакьда.
Ламрал акьахун са айиб, эхвичIун кьве айиб.
Лам никIе авани, къурта?
Лам тIуьр жанавур.
Ламра кIвачел акъвазна неда, инсанди ацукьна.
Лам гьа лам я, алух масад.
Ламраз зегьферан вуч ятIа вуч чида.
Ламра кIуру яна женнетдиз аватна.
Ламра-лам чухвай гьисаб хьана.
Ламран кIулай алух кими жедач.
Ламракан регъуь тахьайIа лам гатадан кIарцIихъай кьванни регъуь хьухь.
Ламраз пурар ягъуналди адакай шив жедач.
Ламрал карч хьанайтIа, нехирда малар тадачир.
Ламраз мухан къадир вуч чида.
Ламраз хъсанвал чидач.
Ламраз вичин пар акьадай чка чир жеда.
Ламравай хабар кьуна — валай ахмакьди авани? (Зал акьахнавайди),— лагьана ада.
Ламраз руьхъ акурла хвеши жеда.
Ламрахъ балкIандин ругунар агулдмир.
Ламралай аватанди рекьида, балкIаидилай аватайди рекьидач.
Ламни верч руьхъведин дустар я.
Ламраз руьхъ, жейрандиз цуьк.
Ламран душман балкIандин тIветI я.
Лам кьарада акIайла иеси гужлуди хьаназ кIанда.
Лашуни як атIуда, гафуни кIараб.
Лампади вичин пунуз экв гуда.
Лацу балкIан кьуьзуь жедач.
Лацу балкIандиз, жегьил агъадиз къуллугъийимир.
Лагьайди ахмакь хьанитIани, ван хьайнди герек акьуллу жен.
Лекь акур верчер хьиз катна.
Лиф азадвилин лишан я.
Лиэн хьайила балкIан жагьида.
Лугьудай гаф жакьвана лагь.
Лугьуникай вуч дад ава, акьул ярдин кьиле кIанда.
Лутудин чIал лутудиз чида.
Лугьумир лагьайла элкъуьмир.
Лугьудайбур гзаф жеда яб гудайбур тIймил.
Лув гуналди вечревай гардан яргьа кьаз жедач.
ЛагьайтIа кьил тIар жеда, талгьайтIа рикI.
Лит къуьнихъ хьуналди чубан жедач.
Лугьуз жеда манияр, анжах сес авач.
Лапаткади гадарна вахъ, керкиди гадарда жувахъ виридалайни хъсан мишер захъ-вахъ.
Лиферикай кичIевили кIахар цазвач.
Лиф кIвалин пипIел жеда.
Лиэнар квачир балкIандал акьахмир.
Лампади худ виниз тавунмаз экв гудач.