“Лезги зарияр” (кьвед лагьай куьмекчи ктаб)

Йисар къвез алатзава, чи литературадик, халкьдин сивин яратмишунар кIватIуник, къайдадиз гъуник, абур ахтармишуник пай кутур рухваярни рушар несилрин рикIелай тефин патал, абур яшамиш хьайи девирар, абурун эсерар, ктабар, агалкьунар чир хьун патал чи тIвар-ван авай алим, писатель, илимрин доктор, профессор, лезги эдебият кIватIзавайди ва ахтармишзавайди тир Къурбан Халикьович АКИМОВА “Лезги зарияр” - куьмекчи ктаб туькIуьрнай.
2001-йисуз чи ватанэгьлийрин гъилиз атай а ктабда 270 касдикай малуматар, чи писателринни шаиррин санал янавай бязи шикилар ганвай. Амма алим и ктабдал акъвазнач. Фольклор, литература датIана вилик физвайди фикирда аваз, Къурбан Халикьовича гьар са цIийи автордикай, акъатай ктабда гьатнавай ксарикайни цIийи делилар кIватIиз, литературадин тарихдал кIвалахиз хьана. Ингье и йикъара лезги эдебиятдал ва адан тарихдал рикI алайбур патал шад хабар агакьна - “Лезги зарияр” - кьвед лагьай куьмекчи ктаб чапдай акъатнава. Аник гзаф алаваяр, цIийи малуматар акатнава.
Куьмекчи ктаб ученикри, студентри, муаллимри, алимри, милли литературадал рикI алай инсанри куьмек къачун патал теклифнава. Кьве агъзур экз. тираж аваз чап авур сад лагьай ктаб гзаф ксарив, библиотекайрив агакьнай, авторди вичиз гайи куьмекрай Дербент шегьерда авай мергьяматлувилин “Шах Вече” фондуниз чухсагъулни малумарнай. Гьайиф хьи, алаваяр кухтуна чапнавай и цIийи ктабдин кьадар 300 экземпляр я. И сеферда авторди ам хсуси ва агьалийри подписка авур пулунин такьатрихъ акъуднава. Кьвед лагьай сеферда акъатнавай ктабда цIийи малуматар, VII-XXI асиррин шаиррикай, гьикаятчийрикай, драматургрикай, гьакIни сифте яз чпин хсуси эсерар авай ашукьрикай, фольклор ва литература ахтармишзавай алимрикай, критикрикай кхьенвай малуматар гьатнава. Им алимдин чIехи алахъунрин хъсан нетижа, тебрикдай кар я. Сифте ктабда яратмишзавай 270 касдикай малуматар авайтIа, цIийида 460 - ава. Гьа са вахтунда чеб яшамиш хьанвай анжах асирар малум ксар тахминан хайи ва кьейи йисар къалурнава, лезги чIалал эсерар авай стха халкьарин векилрикай малуматар кутунва. Мадни виле акьадай са алава - чIехи пай зарийрин шикиларни чапнава.
Ктаб тупIалай авурла мадни шад жедай кар ам я хьи, ина Азербайжан пата яшамиш жезвай, лезги, урус ва туьрк чIаларалди яратмишзавай ватанэгьлияр, жегьил зарияр кьатIуз жезва. Къурбан Халикьовичан и ктабдизни литературадин илимдин жигьетдай цIийи энциклопедия, чирвилер гунин жебехана лагьайтIани, ягъалмишвал туш. Ктаб къачурбурув гьакъикъи хазина агакьда! “Лезги зарияр” гьар садаз герек, вичикай куьмек къачуз жедай ктаб хьанва.

Дагъви ШЕРИФ
Лезги газет