Дидед чIал

Гьар дидедин къуьнераллайд – чIалан пар,
Чи дидейрин са веледни чIал тушни?
КьепIин кьилихъ лугьузвай чи лайлаяр
Лезги дидед чIалаз ядай звал тушни?..
 
Чи дидейри тIапур рикIе ифириз,
Гаф чрана фу кикIайвал тIанурдиз.
Гафар цана квадар тийин ишириз, –
Са шехьзавай диде лугьун гургурдиз.
 
Хайи чIалан рикIиз риб хьиз сухнава
Патан гафар, чIуру гафар гъуьлягъри.
Лезги чIала дидед рикIин кIус ава, –
Хъуьтуьл гафар хер сагъардай чIем, гъери.
 
Гамар кваг-кваг хразвай чи дидейри
ЧIалазни хупI иер яна нехишар,
Крар гзаф, мецер хцIи, гаф цицIи, –
ЧIалаз яна гамуз ядай эришар.
 
Чи бубайри женг чIугурла дявейра,
Кармаш хьана чи дидейри чIал хвена.
Гьатай чIавуз чи кьисметар кIевера,
Чи бубайрин бармак хвена, пел хвена.
 
Кьил агъузда: «Заз вун кIанда!» – лагьайла, 
Регъуьвалдай мулдин цуьк я лезги руш.
Гапур кьуна ам майданда къугъвайла,
Катна Надир, сив-кьил хана, тIиш – питIиш. 
 
…Рагарилай, чархарилай алахьна,
СтIал-стIал чи лекьерин рикIериз.
Чи лезги чIал лезгивилин чирагъна,
Ша, экъечIин чун пакагьан рекьериз!

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.

Ухшар макъалаяр