Нуредин Шерифов

ЭкъечIа!

Уях хьухь халкьар,
Мукьва я йикъар...
Кьуна гъиле лаш
Куьн яваш-яваш
Муькъвел экъечIа!
Авуна суракь,
жагъура яракь.
Девлетлуяр кьаз,
Зулумд даях хаз,
Рекьел экъечIа!
Гьич буш вязерин
Куьн чIалахъ тежен.
Гаф-чIал сад ая,

Авани?

Вилик акур крар чуьнуьх
Ийидай инсан авани?
Хажалатлу рикI сагъардай,
Духтурриз дарман авани?

Сада неда дулмани аш,
Сада чIугваз датIана каш.
Агъайри лукIраз гуда лаш,
Эллер, гьахъ-дуван авани?

ЖедатIа?

РикI цIвазва рикъини куз,
Яраб серин гар жедатIа?
Фикир чIугвар жегьил я зун,
Яраб кIани яр жедатIа?

Гьикьван хьурай гишила вун,
Инсаф яни нер фу тахьун.
Квахьна хуьряй и каш азгъун,
Чаз регьят тир кар жедатIа?

Билбил

Хуш яни ваз къацу тамар,
Кьуна мескен гьана, билбил?
Цуьквед вилик ийиз шелар,
Хьайла зи рикI кана, билбил?

Гатфар чIавуз меген ви кар,
Агь-зар яни йифер-йикъар?!
Авадариз вилин накъвар,
Ви рикI гьида хана, билбил?