Вил гала зи хайи чилин накьварихъ,
Диде акур зи шадвилин накъварихъ,
Аял чlавуз рагал авур ахварихъ,
Хайи хуьруьхъ, бубад сурухъ вил гала.
Вил гала зи «Периздадихъ», мехъерихъ,
Чил юзурдай чи туьнт лезги кьуьлерихъ,
Суван синел чарх язавай лекьерихъ,
Кукlушрай на къачур бине,
Виридлай заз язва вине.
Акl я хьи заз дидед гине
Авайди хьиз куьгьне пине,
Гъуцари чаз гайи вацl,
Зи хайи чил, хайи вацl.
Садзамач хьи, Къуба, Куьре,
Чlал амач хьи, лезги хуьре.
Ягъийрин кlуф хьанва гъуьре,
Акуна заз тават хуьруьн,
Иер чина аваз хъуьруьн.
Мез рахадай ширин-ширин,
Ширширд ванцел вацl хьтин руш -
Шумал буйдин нацl хьтин руш.
Чуькьвезва рикl - жезвач секин,
Гьаларни кваз хьанва серин.
Гуя таж я им цуькверин,
Зи ашкъидин яцl хьтин руш -
Акунайтlа вилериз югъ шад хьайи -
Са чкlанвай рикlин кlусар кlватl хьайи,
Хайи чилел зи лезги халкь сад хьайи,
Куьч хъжедай цаварал зун лиф хьана.
Акунайтlа кьегьалдиз югъ - кlвал хьайи,
Сихилд мецел пак тир дидед чlал хьайи,
Куь рикlера, зи рикlе хьиз, тlал хьайи,
Низ чир хьана лезгид къадир,
Гъурбатда жез гьар сад эхир!?
Алатай хьиз чубандин вил,
Гьар патахъди физва нехир.
Баку, Сургут, Тюмень, Ростов,
Лезгид ватан туш Саратов.
Вучиз гьарнихъ жезва чун цуькI,
Лезги хуьрер етим таз икI?
Зи лезги чlал, вун зи турни, къалханни,
Гадрайдахъ вун жедач мезни, кIалханни.
Зи лезги чlал, вун зи тlални, зи квални,
Течирдахъ вун авач гьич са шел-хвални.
Зи лезги чlал, вун зи духтур, дарманни,
Хиялдай кьван вакай я зун пашманни.
Зи лезги чlал, вун зи мезни, терезни,
Лезги элдиз тарихди гьич чин ганач,
Я гьакимри чаз са пак тир кьин ганач,
Я гъейрида акъудна хьиз рикI ганач,
Гьинва регьбер кlула халкьдин пар авай?
