Сархан Ярагьмeдов

ГьикI кхьида

Кхьида за, гьахъ кхьида, бес и нагьахърикай гьикI кхьида?
РикI   тIарзавай   дердерикай,  сузайрикай   гьикI кхьида?
 
Дидед  чIални, бубад чил я, гьахъ  касдин намус-гъейрат,
Чил  квадарна, ч1ал  чизмачир  алчахрикай  гьикI кхьида?
 

Чуькьуьзва зун

Инсанарин   уьмуьр  фани,   сал   авуна  дуьнья   гъвечIи,
Чуькьуьзва зун и уьмуьрди, кьуд цал я  заз  дуьнья  мичIи,
Зулумди  заз  гъил  яргъийиз,  хуш  хиялрин бахтар  ичIи,
Я   инсанар   рекъе  физвач,  яни   и   зун   рехъ физавач.
 

Лагь

Дуьнья   мичIи  аквазавай,   жуван  йикъар  мичIи  я  лагь,
Масдан фу нез уьмуьрзавай,  жуван  крар  гъвечIи я  лагь.
 
Гъилевайди ахъайна гьакI, цававайдахъ къекъвез тагьуй,
ИчIи   шишел    ацурзавай,    жуван    чанар   ичIи  я  лагь.