Зун Лезги я!

Зи рикlикай суфра хьуй квез межлисдин,  
Амма ана кам тахьурай иблисдин.  
Зун лезги я физвай хуруз чайгъундин,
Невсинал цlай эцигзавай азгъундин.      

Ацlанва зи рикl къайгъуйрив,дердерив,  
Кьезилзава ам умудлу бейтерив,  
Акъудзава винел халкьдал алай дерт,  
Инсанвилиз гьуьрметзава гена мерд.

Минетзава: хиве кьамир ажузвал,  
Ам я руьгьдин гзаф залум бахтсузвал.  
Шерик жемир лавгъавализ невсиниз,  
Темягь мийир чара касдин ирсиниз.     

Гьахъни батlул гьатнава къе женгина,  
Зун чухвазва гъвечlи халкьдин дердина.  
Дуьнья алаш-булаш хьанвай вахтуна,  
Чиновникри чка кьазва тахтуна.     

Агал хьанва чи бахтунин ракlарар,  
Эвеланбур хьана акур ахварар.    
Гьайиф чlугваз чи къулайсуз уьмуьрдин,   
Мусибатри усалзава девирдин.    

Зун лезги я, зегьметдин цlа чранвай,
Гьаядикай бахтунин жем хранвай.
Стхавилин ялав кузвай рикlерал,  
Эверзавай лезги халкьдиз мехъерал.     

Лезгистан я чи бубайрин пак Ватан,  
Шад межлисрин гурлу демерин макан,  
Дегьзаманда Надир-шагьдиз инад кьур,  
Циф хьиз, атай еке кьушун авур кур.