ЧкIанва чIал

ЧкIанва чIал, зи лезги чIал,
Кузвач адахъ къе жуванбур.
Чи чIал лугьуз хайибуру,
Мус хкида адал абур?

Гьин аямди, гьин залумди
ЧIукнаватIа зи битавди?
Какахьнава адан гьалар,
Кьунва къаю, кьунва давди.

Къе аямди ийиз кьатI-кьатI,
ЧкIанва чIал. ЧкIанва агь!
И мусибат, и аламат,
РикIе туна эх жедан, лагь? 

ГьикI эхзава бес хайида,
Залан парар штуннавай?
Перишан я зи чIалан гьал,
Мехъерд либас хтуннавай.

Ни къачурд я икьван гафар
Арабривай, фарсаривай?
Ихьтин дамах низ герек я,
Патанбурун фурсар авай?

Мез къаткидай, рикIиз кIани
КIанзама кьван гафар аваз,
Урус патай, мугъул патай
Келимаяр ни гъана чаз?

Гьазур я чун, викIегь я чун,
“Марк”уникай “тая” ийиз.
Чал чарабур алават туш,
Къе “кьвал”икай “къая” ийиз.

Я зарияр, я хайибур,
“Нагъил” мийир “мах”арикай.
Я Алпандин тIвар хвейибур,
“Бажи” хьанан “баха”йрикай?

“Пенжери”дай килиг мийир,
Зарул туна жуван “дакIар”.
Масдаз “къапу” ава лугьуз,
Игисдани кIвалин “ракIар?”

Чна гьар кар, гьар са кIвалах,
“Башламиш” ваъ, “авалнава”.
Гъуцари чи кьисметдин вар,
“Багъламиш” ваъ, “агалнава”.

“Ухшард” кьадан, аваз “дигайд?”
“Ериш” жедан “къекъуьникай?”
Вучда масдан “сабагь”дикай?
“Сегьер” жедан “экуьникай?”

“Куьрпуь” кьамир “муьгъ” аватIа,
“Кулак” жедач “шагьвар”дикай.
ТIимил аван чаз “гъуьлягъар?”
Вучда масдан “шагьмар”дикай?

Жуван гафар кIар-кIар ийиз,
Патанбурун къула кумир.
Ашукь хьана “къешенг”бурал,
“Иербур”ув хъелиз гумир.

Авазарихъ яб це чIалан,
Шуршурзавай вацI я Кьулан.
Адан патав цуьквер таб я,
Валлагь, вири эквер таб я.

Квадарна бахт гъиле авай,
ЦIийид кIандан цаваривай?
Бахтлу тушни чилинвияр,
Чи чIал хьтин тавар авай?

Чи нугъатда, гафалагда
Гьикьван иер гафар ава.
Лагь гьин чIалан хафалагда
Икьван мили хафар ава?

Булах я ам алахьзавай,
Макьам я ам авахьзавай.
Ам зи ацIай виртед куьнуь,
ЧIал авани икьван къени?

Ам зи иман, ам зи пIир я,
Ам зи суьгьуьр, ам зи сир я.
Ам сабур я лезги чилин,
Ам абур я лезгивилин.

Цихъ тамарзу баянлух хьиз,
Гафари зи хъитIкьинзава.
РикI кудайдахъ цIигел хьана,
Вири тIалар хъуьтIкьуьнзава.

Ша, алахъна кIватI хъийин чIал,
Гьич тахьайтIа чкIур тийин.
Жуван гъилив жуван рикIе
Чна хенжел акIур тийин!

Комментарии

Прям разложили ВСЕ, ВСЕ что есть, ВСЕ как есть !!! Браво Седагет ханум, Вы самая Лучшая писательница, которая заботится о НАШЕМ РОДНОМ языке !!! Я не говорю уже о вашей газете "Самур", где Вы внесли ОЧЕНЬ большой вклад в НАШ язык !!! Желаю ВАМ ОЧЕНЬ БОЛЬШИХ УДАЧ и УСПЕХОВ !!! С помощью Вас Мы храним свой Чистый Лезгинский язык ... а то бы как Вы отметили в стихе
"Ни къачурд я икьван гафар
Арабривай, фарсаривай?
Ихьтин дамах низ герек я,
Патанбурун фурсар авай?"

Сагърай !!!

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.