Вахт

Вахт, вун зи дуст я лагьайтIа, гьахъ жедач,
Заз чида вун туширди зи душманни.
Гагь вакай зи кIвачик ифей ракь жеда,
Гагь зи хирез жеда вакай дарманни.
Лугьуда на: «Зун гар, вунни цIакул я»,
Амма цIакул хкаж жеда гъетерал.
Лугьуда на : «Вун як, зунни чукIул я»,
ЧукIул гвайди эцигда за метIерал.
На дяведиз ракъурда зун, кьин патал,
Зун эбеди цIай хьана мад куда, вахт.
На чил хада, зун чилерик фин патал,
Зи тум хуьда зи рухвайри - цIуда, вахт.
Вахт, зунни вун женгинава датIана,
Ви пешедал ийизвач за пехилвал,
На кьуьзуьвал гузва чилиз атана,
За уьмуьрдиз багъишзава жегьилвал.
Ингье, на уф гана цуьквер кьурурна,
Дидед чинал цанар цана биришдин.
Кьуьзуь лежбер мягьфедаваз ракъурна,
Ярхарна мегъв, рахаз хьайи вишришдив.
За дагълара акIурзава къелемар,
ТIваларикай кьеб хразва аялдиз,
Жегьил рушаз цвазва туйдин перемар,
Чил хуьдайвал чирзава за кьегьалдиз.
Ваз кIанзава хкадриз цIай уьмуьрдин,
ГьакI завайни такабурвал къакъудиз.
Ваъ, за а цIай хуьда цIарцIе шиирдин,
Уьмуьрдин экв мад инсанрив агудиз.
И дагълара хуьда за гел жейрандин,
Жуван рикIин нехиш тада гъетерал.
Вахт, вуна ваъ, эхирни за - инсанди
МуьтIуьгъна вун акъвазарда метIерал!