Кьве кIвачел къекъведай лам

Кьве кIвачел къекъведай са лам
Акуна заз, тIвар авайд туш:
Чидач гьич чIугвадай улам,
РикIиз гьич кьарар авайд туш.

Ахьтин затI жеч и дуьньяда:
Рипе мухни санал неда,
Куьгьне леэн кваз гуьнеда,
Кьежей къуз гьунар авайд туш.

Я яц, я балкIан, я гамиш –
Гьич са затI жеч икьван къизмиш.
Адаз вичиз гьич бегенмиш
Падишагь, хинкар авайд туш.

Куьгьне кьенер вичин сиве
Тун тавуртIа, кьада дяве,
КIасна рекьиз кIанда деве,
Вичелай санкIар авайд туш.

Гьакьван рази хьанва къе чун,
Виш манат це, квезни къачу,
Вичин тумун кIаник кашу
Квайд я, мад кIаркIар авайд туш.

Рангни буз я, вични эркек,
Агъзурдакай садни жеч тек,
ТIиш цавуз кьаз яда гьакI кек,
Юкъуз-йифиз ахвар авайд туш.

Гьикьван туькIвейд я амалар,
Тваз вичин хамуна ялар,
Тадайди туш нехирда малар, -
Гена вич крчар алайд туш.

Къекъуьнизни гьакьван зирек,
Регъуьз секлем тухуз герек.
Твагни къалгъан твазва хуьрек,
Маса куьнив кар авайд туш.

Еришдизни гьакьван дири,
Са синих ква – тум я куьруь.
Гьелбет, рехи хьана фири,
Акьул вич санбар авайд туш.

Залпандин кьил вуна чилел
Вегьемир, алчуда гъилел:
Диши лам акуртIа, кьилел
ЧIугвад, ихтибар авайд туш.

Гьар къвайи къуз кьадач кIвачер,
Алукьиз кукIварда тIишер.
Гьич са затI жеч ихьтин ашер,
Тавш лугьуналд ар авайд туш.

Акахьна балкIандин тIветIер,
Гьалчиз чилел къахчуз метIер.
Гьич са затI жеч ихьтин бетер,
Лугьунин кьадар авайд туш.

Халис шив хьтинди я хвейи,
виш манатдин я гьавайи.
Чубандилай къир-савайи,
Масадаз бакар авайд туш.

Гагь-гагь акьул жеда кьери,
вичиз течиз вичин ери.
КIватIайтIа гьайванар вири,
Адав барабар авайд туш.

ТIимил мухалди вердиша,
Йифди югъди гьар гьамиша
Жезмай кьван ишлемиша.
Ял ягъиз икьрар авайд туш.

Эй Сулейман, на и ванер
Низ хьуй лугьуз, гьалчда къванер?
Эхир кукIварда ви къуьнер,
Им чIалаз ухшар авайд туш.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.