Девлетлуяр, чиновникар

Я стхаяр, пул авайдаз...
Начальник уртах хьана хьи.
Инсаф ая вуна залум.
Кесибариз гужар хьана хьи.

Инсаф ая вуна залум.
Кесибариз гумир тlун рум.
Иеси кьей "добрым утром",
Халхьдиз вакай мах хьана хьи.

Гъуьрел тlвар эцигна "мука"
Некlедиз лугьуз "молока"
Чукlулни шиш , каструлка,
Ихьтин къаб - къажах хьана хьи

Гьакl кьиляй - кьилиз фидани?
Куь крар гьакl дуьз жедани?
"Сагъ хьуй" лугьун "досвидани"
Им маса саягъ хьана хьи.

Эрчlи гъиле кьуна зунтlук,
Алукlна са куьруь суртук ,
Къекъуьриз гьар патахъди тlук,
Шляпкlа ,пlапlах хьана хьи.

Къулавай цlуз лугьуз "огон" ,
Киридиз лугьуз " прогон " ,
Къуьнерал хьайила погон,
Тlишерал къармах хьана хьи.

Гьар са кардал хьана зун мат,
Хьана им чаз хупl зулумат,
Экъуьгъун я "яп-тфай-мат",
Халкьар икl яншах хьана хьи.

Кьве чин акьалтнамаз вичал,
Ришвет къачуз, тагуз мажал,
Кесибариз лугьуз " пошел ",
Ибурув дамах хьана хьи.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.