Ачух а к1еви вар

Мубаракрай квез и сувар — 
Чи уьтквем тарих, Дагъустан. 
Ачух хьана а кIеви вар. 
Аквазамач кесиб нисан,
Хьанава уях, Дагъустан.
Фяле, лежбер хьана шерик,
Залумар кутуна кIаник, 
Чун кесибар азадвилик,
Гьар сувар я за квез тебрик 
Авуниз лайих, Дагъустан.
Душманарин агьузарар,
Чпихъ элкъвена а зурар, 
Кьурана мецер, пIузарар. 
Чуьнуьхнавай чи суварар 
Хьанава ачух, Дагъустан.
Зиллетдин къар фагьума ви:
Чал «контрол» алай кIеви, 
Чи якIap нез, хъвазвай иви,
Тан жедачир я чи цIийи,
Я руфунар тух, Дагъустан.
Лежбер, фяле жедай цIигел 
Жагъин тийиз са регьат гел, 
Йикъалай-къуз жедай бейгьал
Фикир ийиз жуван рикIел
Гьа фейи югъ хуьх, Дагъустан.
Залум ханар, залум беглер. 
ИкI зулумдик кутур эллер, 
Аренда гуз чав чи чилер, 
Чпиз къахчуз муьфтез къуьлер,
Чав нез тадай мух, Дагъустан.
Бег, хан акурлахъди зурзаз, 
Кьилин чIарар жедай цаз-цаз, 
Нагагь ада авур приказ
Мумкин тушир ийиз отказ—
Залумдин буйрутъ, Дагъустан.
Къуз садра ви гъенел дилмаж 
Лугьуз къведай: ви дегьек гъваш. 
Кесибдин гьал жедай яваш.
Юкъуз вадра хандин къирмаж
Галукьдай кьилихъ, Дагъустан.
Залумар чеб акьулар кем,
Дуьньядин гьич титан белкем
Шикил яру, вичин уьтквем, 
Буржи я чи кьуниз мягькем
Гъалиб чи лайдах, Дагъустан.