Хан рахуникай кьиса

Яргъал тир са дагъдин хуьре,
Са тIимил кьван кIвалер авай;
Къилихар квай гьар са жуьре,
Жуьреба-жуьр эллер авай.

ГьикI ятIани, кимел суьгьбет,
Аватда кьван са хандикай.
Адак хесет квалдай, гьелбет,
Чи дерейра гьич ван тахьай.

Гуя, а хан ерли садав,
Рахан тийир гьаким хьана.
Деведин хьиз, патахъ мандав,
Дуьз тежедай итим хьана.

И ван хьайи халкьар кимел,
Хъуьрей чIавуз тух жедалди;
Са ахмакьдик, акатна хъел,
Хвайидак хьиз лух жедалди.

ТIуьн тавуна ризкьи гьалал,
ГьакI къупаран хьана кIамаш.
Гъун паталди а хан чIалал,
Вуч хьанатIа, гила тамаш!

Экуьн кьиляй къарагъна фад,
Хиве кьур кар алаз рикIел;
Ахтармишна хан къведай пад,
Акъвазда кьван сункь хьиз рекьел.

Са сят, кьве сят гуьзетиз рехъ,
Эхир хьи хан акъат хьана.
Хъархъун тарай рахай хьиз пехъ,
Хандик къурху агат хьана.

Хан – балкIандал, мукьвал ала,
ЧIичIам бапIах пеле аваз.
Ахмакь рекьин юкьвал ала,
Са патахъ лаш гъиле аваз.

Хандиз адахъ рахаз кIан туш,
Фидай рехъни авач пара.
Ханни, гьелбет, лал гьайван туш,
Хъел атункай чара авач.

БалкIан – инихъ, ахмакь – гьанихъ,
Хура кIанчI хьиз акъваз жеда.
Виликай квахь тийиз санихъ,
Ахмакь хъуьрез-къугъваз жеда.

Чара атIай ханди эхир,
Экъуьгъда пис хъел акатна!
Хъвайидак хьиз цуру чехир,
Ахмакьдак шад сел акатна!

Вичиз авур агьни-аллагь,
Квазни кьунач: хан рахана!
ГатайтIани келле, валлагь,
Лал тир биши къван рахана!

Муштулух гуз, катна хуьруьз,
Хан рахана лугьуз вичив.
Камар вилик къачуз ириз,
Рехъ атIана кьецIи кIвачив.

Ван хьайибур хьанач чIалахъ,
Нив хьайитIан хан рахадан?
Ахмакь касдив – кIвачни чилахъ,
Мердимазар къван рахадан?

Эхир сада кьуна хабар:
«Хан вахъ галаз гьикI рахана?»-
Ахмакьда тик кьуна япар,
«Хан захъ галаз икI рахана.

За кьур чIавуз ам къведай рехъ,
Хандин ийир-тийир хьана.
И дуьньядал ала кьван гьахъ,
Зи тIвар элдиз загьир хьана!-

ИкI лагьана, ахмакьди шад,
Хкадардай кьуьл авуна.
Марф къвайила, кIватI жедай яд,
Вирикай са гьуьл авуна.

«Вучда ахьтин хан рахункай?
«Квахь, ламран хва!»-лагьай чIавуз?»
Гуж я акьул тахьункай,
Регъуь тежер ахмакьбуруз!
--------
Завай инал ахмакьдикай,
Пара кьадар рахун хьана.
Регъуь хьана ахлакьдикай,
Жувни са кIус яхун хьана!

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.