ХупI ярашугъ я

Къужадиз сабур,
Жавандиз абур,
Баладиз хатур,
Чилиз ракъин нур
ХупI ярашугъ я.

Фагъирдиз гуьрмет,
Муьруьддиз хелвет,
Асландиз жуьрэт,
Игитдиз къирят
ХупI ярашугъ я.

Эсилдиз бине,
Писвилиз тегьне,
Гьуьлериз дегьне,
Далдамдиз зуьрне
ХупI ярашугъ я.

Дуьньядиз элем
Я рушват, селем.
Ашукьдиз мягькем
Я Эсли, Керем,
Ктабдиз бегьем
Девит, чар, къелем
ХупI ярашугъ я.

Етим, я ви гьал,
Ийир бед хиял,
Агьилриз камал,
Жегьилриз жамал ,
Жумартдаз девлет-мал
ХупI ярашугъ я.

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.