Ийимир

Эй, туьтуькъуш, аллагьдин хатурдай,
Зи чинебан сир ашкара ийимир.
Вегъемир зун элдин вилик абурдай,
Зи чинебан сир ашкара ийимир

Гьатна рикIе ашкъи, за вуч ийин мад?!
НиштIер яна, ийида за зи рикI пад.
Жув рекьида, вун ийида за азад,
Зи чинебан сир ашкара ийимир.

Хажеди зал ашкъидин хьел чIугуна,
Зи азад рикI вичин есир авуна,
АкунатIа чун анжах ваз акуна,
Зи чинебан сир ашкара ийимир.

Гьар пакаман серин шагьвар кIан я заз,
Зи ярдикай са хуш хабар кIан я заз,
Вун къизилдин къефесда са кIубан яз
Хуьда, зи сир на ашкара ийимир.

Эй туьтуькъуш, зун вал даим гьейран я,
Ви къуллугъда акъвазнавай инсан я,
Лугьузва ваз Лейлиди зун къурбанд я,
Зи чинебан сир ашкара ийимир.