Лезги Эгьмел ва Хесте Кьасум (гьуьжет)

Лезги Эгьмед:
Вун хвашкалди, уста Кьасум, шад я чун,
Ша майдандиз, элдин гьуьрмет авайди.
Машгьур хьанвай ашукьрикай сад я вун,
Лезги Эгьмед я вахъ галаз рахайди.

Хесте Кьасум:
Лезги Эгьмед, ви тIварни чаз машгьур я,
Ваз жаваб гуз зун майданда гьазур я,
Заз чидайди фагьум, фикир, сабур я,
Аквазва заз вун дамах гваз атайди.

Лезги Эгьмед:
Суал гун за, жаваб це на иердиз:
Макан кьунва кьефесда гьи шегьерди?
Вуч ятIа лагь вич маса гуз тежерди.
Малум яни ваз чанда вирт авайди?

Хесте Кьасум:
Ви суалдиз жаваб гун за иердиз:
Кьефес макан я рикI лугьур шегьердиз.
Акьул-камал я маса гуз тежерди.
Шекердин нацI я чанда вирт авайди.

Лезги Эгьмед:
Лепе тежез рагъул жерди вуч гьуьл я?
Гьи багъманчи цIикьвед багъдин векил я?
Виридалай яргъалди гьи мензил я?
Вуч я югъ-йиф вич ахвара авайди?

Хесте Кьасум:
Лепе тежез рагъул жерди гуьгьуьл я.
Багъманчи рагъ цIикьвед багъдин векил я.
Лап яргъалди гъетерал фир мензил я.
Къван я югъ-йиф вич ахвара авайди.

Лезги Эгьмед:
Ам вуч я хьи вич авазни авачир?
Вуч перем я гьич са цвални алачир?
Вуч ятIа лагь – я деве, я шив гвачир,
Даим-эбед сиягьатра авайди?

Хесте Кьасум:
Хъен куьлге я вич авазни алачир.
Хам я перем – гьич са цвални алачир.
Рагъни варз я – я деве, я шив гвачир.
Даим-эбед сиягьатра авайди.

Лезги Эгьмед:
Уста Кьасум, жаваб це зи суалдиз:
Вуч я вири рангар хасди жамалдиз?
Квекай я цав, гъваш кван жуван хиялдиз?
Хрун тавур гам чидани авайди?

Хесте Кьасум:
Лезги Эгьмел, жаваб я ви суалдиз:
Хас я гьар са ранг гатфарин жамалдиз.
Нурдикай я цав – гъизва за хиялдиз.
Гуьлчимен я гамунин ранг алайди.

Лезги Эгьмед:
Гьи къуш я лагь, йиса хада са кака?
А какади кьада вичиз гьи чка?
Муг авачир къуш, гьим ятIа лагь акван,
Физ чарадан мука кака хадайди?

Хесте Кьасум:
Ам симург я – йиса хадай са кака,
Живед винел чуьлда вичиз кьаз чка.
КукупI гьа къуш я – чарадан физ мука,
Акатайвал вичин кака хадайди.

Лезги Эгьмед:
Зи сулриз дуьз жавабар на гузва.
Гьи гьисабди кьуьзуьвилихъ тухузва?
Ам вуч я хьи – катиз тади къачузва?
Вуч я ада эхир макан кьадайди?

Хесте Кьасум:
Эхь, жавабдин гафар за дуьз лугьузва.
Яш гьисаб я кьуьзуьвилихъ тухузвай.
ВацI я даим катиз тади къачузвай,
Гьуьл я ада эхир макан кьадайди.

Лезги Эгьмед:
Ашукь я вун, устад я вун вижевай,
Седефлу саз лайихлу я хъуьчIевай.
Гила вуна суалар це миже квай,
Закай хьурай ваз жавабар гудайди.

Хесте Кьасум:
Ам вуч затI я кIуфай бала хадайди?
Чидани ваз чандиз дуван кьадайди?
Лагь вуч ятIа инсан кIеве твадайди,
Садавайни чара ийиз тахьайди?

Лезги Эгьмед:
Къуьлуьн твар я кIуфай бала хадайди.
Ажал я ам чандиз дуван кьадайди.
Кьуьзуьвал я инсан кIеве твадайди,
Садавайни чара ийиз тахьайди.

Хесте Кьасум:
Вуж я инсан алуддайди рекьелай?
Вуж алатдач гьич садрани рикIелай?
Лагь нехишар куьн луварин винелла?
Чидани ваз кьил галачиз фидайди?

Лезги Эгьмед:
Алудзава иблисди дуьз рекьелай.
Диде-буба алатич гьич рикIелай.
Нехиш-халар чепелукьдин винелла.
Марфад квак я кьил галачиз фидайди.

Хесте Кьасум:
Куь кхьида чарни къелем авачиз?
Вуч къав я ам даях-дирек, цал квачир?
Вуч рангар я ягъай рангар алачир?
Вуч я гъилер, кIвачер квачиз хадайди?

Лезги Эгьмед:
РикI я герек тежедайди къелем, чар.
Даях-дирек квачирбур я генг цавар.
Яргъи рушан ирид ранг я а рангар.
Къиб я гъилер, кIвачер квачиз хадайди.

Хесте Кьасум:
Лагь чидатIа ваз чIулаввал михь тежер.
Вуч сакит я, вуч куьч я – вич хуьз тежер?
Ам вуч нур я вичин мукьув физ тежер?
Вуч ятIа лагь а нурдикай катдайди?

Лезги Эгьмед:
Намус квадарун чIулаввал я михь тежер.
Дуьнья сакит, кьиникь куьч я хуьз тежер.
Рагъ я а нур вичин патав физ тежер,
Кьаркьулув я а нурдикай катдайди.

Хесте Кьасум:
Ам вуч я хьи, жегьил уьмуьр 15 югъ?
Куьн деринвал гьуьлелайни я артух?
Муьгьуббатдин лукI вуч ятIа лагь ачух?
Девлетрилай вуч я гзаф багьади?

Лезги Эгьмед:
Варз я, гьелбет, жегьил уьмуьр 15 югъ.
Гьуьлерилай илим дерин я артух.
Муьгьуббатдин лукI я гуьгьуьл, эй ашукь.
Девлетрилай вуч я гзаф багьади?

Хесте Кьасум:
Вуч я даим чи уьмьурдиз уртахди?
Вуж я гьахъвал, дуьзвал чIурдай алчахди?
Лагь вуч ятIа гьар гьамиша уяхди?
Дуьньядикай вичиз хабар авайди?

Лезги Эгьмед:
ЧIал я даим чи уьмуьрдиз уртахди.
Буьгьтанчи я дуьзвал чIурдай алчахди.
РикI я, гьелбет, гьар гьамиша уяхди,
Дуьньядикай вичиз хабар авайди.

Хесте Кьасум:
Лезги Эгьмед, гаф амач ви камалдиз.
Мад рахунар ийидач за яргъалди.
Аквада чун, мажал гурай ажалди,
Дуствилелди зун я ви гъил кьадайди.