Куьне рехъ хуьзвай “Аламдин” цIийи нумра

"АЛАМ" журнал

И мукьвара кIелзавайбурун къаншардиз экъечIнавай "Аламдин" цIийи йисан 3-нумрада абур вичел ялдай гзаф очерк, макъала, зарисовка ва хабарар ава. Журнал тIвар-ван авай журналист-алим Ризван Ризванован "Сергьят авачир" кьил эцигна кхьенвай машгьур композитор, шаир, драматург и мукьвара вичин дуьня дегишарай Асеф Мегьманан уьмуьр ва яратмишунрин бязи легьзейрикай ихтилатзавай очеркдалди ахъа жезва. Филологиядин илимрин кандидат, театровед Азиз Мирзабегован "Пердеяр агъузайла" кьил эцигнавай макъалада лезги театрдин сегьнедин устадар тир Кумбай Рамазанован ва адан уьмурдин юлдаш Зуьгьребани Рамазановадин рикIелай тефидай къаматрал чан хкизва. Юсиф Халилован "ЧIал халкьдин девлет я", профессор Ярали Яралиеван "Алупандин ктаб", Ризван Ризванован "ЧIалан михьивиликай, адан иервални мана-метлеб хуьникай са бязи фикирар", алим- кхьираг Къурбан Акимован "Дикъетдиз лайих я", машгьур художник, тарихчи-этнограф Дарвин Велибегован "Лезги чIал-инсанвилин дидечIалаз мукьва чIал" кьил ганвай макъалаяр кьилерилайни аквазвайвал чи халкьдин тIал алай месэладиз-чIалаз талукьбур я. 
Журналист Гуьлера Камиловадин "Художник" тIвар алай очеркда жегьил чIугвар Мелик Агъабалаеван яратмишунрикай, шаир Фехреддин Оружован "Расим Гьажидин кифилдикай, Самурдин суьгьуьр галай ятарикай, кьегьал катрамаканвийрикай" кьил эцигнавай эсседа чи машгьур кхьирагдин прозадин кьетIенвилерикай ихтилат физва.
КIелзавайбуру гьакIни чи рикIелай тефидай шаир ва драматург Забит Ризванован архивдай тир "Чими рикIер, пак ниятар", алим-шаир Арбен Къардаша 1861-1901-йисара Ахцегьин сифте мектебда муаллимвал авур латышрин машгьур кхьириг Эрнест Бирзниек-Упитан уьмуьрдикай къелемдиз къачунай “Кавказдин ашукь тир есир” очерк, Адам Перижанован "КIвализ яргъи рехъ" рекъин къейдер, машгьур журналист-этнограф Абир ЭчIехвидин нубатдин сиягьатдин магьсул тир "ЦIехуьлар" этноочерк хушдаказ кьабулдайдал шак алач.
Журналдин цIийи тилитда гьакIни чара-чара инсанрин рикIел хкунар, сиягьатдин къейдер, ктабрикай рецензияр, жегьил шаирдин шиирар гьатнава.

“КцIар” газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.