Перейти к основному содержанию

Ктабдиз килигна диплом ва медал

Урусатдин Кхьирагрин КIватIалди шаир-публицист Билал Адилов "43" тIвар алай ктабдиз килигна Михаил Лермонтован тIварунихъ галай диплом ва медалдиз лайих акунва.
ГЬар сефер дагълариз акъатайла, и пак алемди зун вичиз муьтIуьгъарда, и аламатрин юкьва жувахъ къекъуьрда, жував, гьиссерин алемдив агудда. Гьар сеферда са затI за кьатIида, дагъларин, лекьерин къилих, “лекьре тIветI недач” хьтин фагьум ина уьмуьрзавай инсанрин ивиди, руьгьди фитIиннава. И инсанрихъ са чара руьгьдин, гьиссерин алем жеда, чи адетар, фолклор иллахьни дагъдин хуьрера ама. Дагълара чи чIалаз басрухар тIимил хьанва. И хуьрерай акъатнавай зарийрин эсеррай дагъларин тIул аквада.
ЭчIехуьре Кьуллад пелел яшар пудкъадав агакьнавай итимри циргъина ацуькьна сятаралди тар ягъаз хордив чи халкьдин манияр лугьуз акуна заз. Ун, хордив! Чи халкьдин "Шарвили" эпосдикай са хейли чIукар СтIурайни кватIнава.

Зун чIехи хьайи, чирвилер къачур Советрин гьакумат чкIана. Зун адан пис-хъсан патарикай рахазвач. "Миллет- капитализмдин бегьер я"- хьтин лозунг авай а девирдилай тафават яз къе чи уьлкведа лезги чIалал журналар, газетар акъатзава. Чи зарийри хайи чIалал ктабар акъудзава, "Алам" журналдин къене "Марвар" эдебиятдин межлис кардик гала. 
Алатай йисуз Бакуда чи играми шаир Билал Адилован "43" тIвар алай ктаб кьве чIалал акъатна. Филолог Раида Ревшана туькIуьрай и ктабдин редактор Азербайжандин лайихлу журналист Видади Севзиханов я. "Qusar-КцIар" газетди, "Алам" журналди, "Лезги газетди" и ктабдикай рецензияр гана. И цIиргъ мадни чIехи жезва. И мукьвара Москвада акъатзавай "Общеписателская Литературная газетадини" "43"-дакай "Дагъдин гарун нефес хьиз" кьил алай гегьенш макъала чапнава. 
Халкьдин шаир Байрам Салимован гафар цитат гъанвай газетди чи ватанэгьлидин улубдиз лайих авай къимет ганава. 
Алатай йисуз Урусатдин Кхьирагрин КIватIалдин орган тир и газетди заридин шиирарни чапнавай. ГьакIни Билал канибуруз, чи поэзия канибуруз муштулухни ганва: Урусатдин Кхьирагрин КIватIалди шаир-публицист Билал Адилов "43" тIвар алай ктабдиз килигна Михаил Лермонтован тIварунихъ галай диплом ва медалдиз лайих акунва. И премия, чи поэзияда Билалан хуьруьнви Дагъустандин Халкьдин шаир Байрам Селимовазни несиб хьанай. 
За кIелдайбурухъ галаз и хвешивал пайна, ктабдин автордиз, ам арадал гъанвайбуруз мадни чIехи агалкьунар мурадзава. 
Билалан поэзия кIелна, иливариз хьайи кIелзавайди бахтавар кас я. И гьиссерин кIунчIунихъ галаз интернетдин сайтарай таниш хьайи болгар зари Дафинка Станевади адан са кьадар эсерар болгар чIалаз элкъуьрнава. "Заз Билалан шииррай Шагьдагъ, чи Родопар кьван пара кан хьана. " -кхьизва ада са блогда. Заз малум хьайивал и мукьвара "Болгарски писател" издателстводи Билал Адилован шииррин ктаб чап авун пландик кутунва. 
Эхь, ватанэгьлидин, къелемдин, руьгьдин, рикIин дустинин, чи "марварвидин" агалкьунри хвеши тавун мумкин туш. Ваз и тIвар, и медал мубарак я, мадни чIехи агалкьунар хьурай вахъ, дуст кас!

 

Эйваз Гуьлалиев
"Кцlар" газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.