Шаир цаварал хъфена

И мукьвара чав Дагъустандай чIулав хабар агакьна. Чи поэзияда вичин хатI, гел авай шира шаир, драматург, публицист Алкьвадар Гьасан Эфендидин несилдин векил Гьуьсейнов Ибрагьим Абдулкериман хва октябрдиз 79 яшда аваз рагьметдиз фена.
Ибрагьим муаллим 1935-йисан 15 августдиз СтIал Сулейманан тIварунихъ галай райондин Алкьвадар хуьре муаллимдин хизанда дидедиз хьана. Хуьре юкьван мектеб, ДГУ-дин филологиядин факултет акьалтIарна муаллим, «Дуствал» алманахдин, Лезги радиодин редакторвиле, Дагъустандин Кхьирагрин КIватIалда консултантвиле кIвалахна. Лезги, урус, дарги, къумукь чIаларал акъатнавай 30-лай виниз улубрин кирам я. Шаирдин къелемдикай «Генерал Абилов», «Ахты. Край чирдай музей», «Академик Магьамедов», «Цлак-наме» хьтин публицистикадин эсерарни хкатнава.Шаирдин драмдин эсерар – «Етим Эмин», «Саяд», «Яру пайдах», «Канивиликай риваят» ва масадбур лезги ва аваррин драмтеатра сегьнедал эцигнава.

Шаир дуьнядилай фейила ШАИР жеда лугьуда. За жуван улубрин арадай, гьакIни дустаривайни суракьна Ибрагьим муаллимдин улубар гъиликна. ЦIийи кьилелай шаирдин руьгьдин алемдиз са шумуд юкъуз сиягьатна. Зи гъиле гьатай эсерар пудкъад, пудкъанницIуд лагьай йисариз кхьенвайбур хьана. Гьелбет, совет идеоло­- гиядин таъсир аквазвай эсерра шаирди милливал хуьз алахъзава. ГьакIни алакьзава.
Ибрагьим муаллимди чи поэзиядиз цIийи жанряр, формаяр, шиирдив кхьенвай драмдин эсерар гъана, тек лезгийрин ваъ, вири Дагъустандин поэзияда цIийи несил шаиррин муаллим хьана. Шаирдин Италиядин поэзиядин чешне тир сонетар кIелай за, шиирдин и кIалуб мадни хъсан чириз алахъна. Адан устадвили зи гьевесни юзурна, цIийи алемдиз эвер гана.
Заз сифте яз урусрин шаир С. Есенинан эсерра дуьшуьш хьайи, зазни пара кандай кIалубрикай Ибрагьим муалимди чи шииратда менфят къачунва. За а формадин шииррикай кьвед кIелдайбурув агакьарзава.
Аман течир кьиникьди рикI, руьгь хайи чIалал ргазвай и иер инсан чавай къакъудна. Дуьнядилай са шаир куьч хьана, цаварал хъфена.
Аллагьди рагьметрай касдиз, хайибуруз, багърибуруз сабур гурай.
Адан зегьметар халкьди квадар тавурай!
Чи ЧIАЛ, чи Халкь сагъ хьурай!

Эйваз
АЛАМ журнал

ВАТАН

КIвалин гуьрцел-
Ватан.
Рекьин эвел-
Ватан.

ВацIун чешме-
Ватан.
Руьгьдин чешне-
Ватан.

РикIин цIуцIрум-
Ватан.
Гурмагъдин гум-
Ватан.

Экуьнин яр-
Ватан.
Сергьятдин цIар-
Ватан.

Шагь дагъ, Самур-
Ватан.
Зи кьеб, зи сур-
Ватан.

Космосдин арш-
Ватан.
Кьегьалрин марш-
Ватан.

Дидедин нек-
Ватан.
Кьве вилин экв-
Ватан.

Рекьин эхир-
Ватан.
Даим уьмуьр-
Ватан.

* * *

Вун къарагъна гьиниз катна?
Вучиз катна вун?
Куьз вун икьван кIеве гьатна?
Агь, къакъатна вун!

ЧIарарин йиф гваз фена вун,
Нур гваз вилерин.
Бедендин наз гваз фена вун,
Лаз гваз хъуьхъверин.

Гваз фена вун зи секинвал,
Кьарай йикъарин.
Гваз фена вун зи эркинвал,
Сагъвал ахварин.

Акъатна вун, вили лиф хьиз,
РакIарай залум.
Зун туна на чIулав йиф хьиз
Экуьнлай магьрум.

Акъатна вун, вили лиф хьиз,
РакIарай ахъа,
ХьрачI кIама ламу циф хьиз,
Гъам гьатна хура.

Сонет

Лезги чил заз ким хьиз жеда, дагъларни
Итимар хьиз гьардаз вичин къван авай.
Къилих авай, югъ-йиф авай, ван авай.
Гьардахъ авай вичин кьадар яшарни.

Кьепербан хьиз акъваз хьанвай кьилихъди
Дагъ гьалтна вал вини кьиле Магъудин,
Лацу КьветIни агъа кьиле КIарудин
Чирагъ вацIун кьер авунвай гъиликди.

Анлай анихъ Къухмаз кIунтIар: пурчарик
Акъвазнава, аялар хьиз гъвечIи тир,
Буюрмишай кIвалах ийиз гьазур тир.

Юкьни-юкьва авай вири дагъларин
Шалбуз дагъ вич ацукьнава, рехи тир
Камалэгьли кас хьиз кимин абур тир.

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.