И мукьвара «Дагъустандин ктабрин издателство»да экуьнал акъатнавай «Умудрин экв» ктабдиз кьве жегьил шаирдин уртах кIватIални лугьуз жеда. Эхь, ктабда Муса Агьмедованни Мегьамед Ибрагимован шиирар кIватI хьанава. Эвелан вахтара эдебиятда сифтегьан камар къачузвай жегьил шаиррин шиирар уртах кIватIалар хьиз ахъаюн адет хьанвайтIани, и кIватIал абрун сад лагьай ктаб туш. КIелдайбуруз М.Агмедов вичин буба Лезги Арифахъ галаз санал акъуднавай «Лезги ким» китабдиз гьатнавай, гьакIни газет ва журналрин чинра чап хьанвай чIаларалди чизвайтIа, М. Ибрагьимован шииррихъ галазни кирамдин кьилди акъатнавай «Илгьамдин сегьер» тIвар алай сифте китабдай таниш я. Сифте гафуна шаирриз хъсан рехъ тIалабзавай А. Къардаша кхьизва: «Муса Агьмедовани Мегьамед Ибрагьимова, кьве кIеви дустуни, къелемдин ва руьгьдин стхади чпин уртах ктаб акъудуналди чеб алатай асирдин 80-йисариз эдебиятдал, эдеби гафунал къимет алай, яратмишзавай инсанрин къадир авай девирдиз тухвай хьиз гьиссна за. Абурун вил гьахьтин къадирлувилихъ галайди кьатIана.
…Алай девирда, гзаф жегьилри «пул квай» рекьер-хулер хкягъзавайла, руьгьдин девлетрикай кьил къакъудзавайла, Мусадини Мегьамеда шаирвилин рехъ хкягъуни, чеб хайи халкьдин руьгьдин алемдиз бахш ийиз кан хьуни абурун мурадар кьетIинбур тирди, вири хьтинбур туширди къалурзава.»
«АЛАМ» журнал
Добавить комментарий