Перейти к основному содержанию

Мухбирвализ яхцlур йис я

Къелем гъиле аваз макъалаяр, эдебиятдин жуьреба-жуьре эсерар кхьиз 40 йис хьанвай Хазран Кьасумован тlвар лезги кlелдайбуруз хъсандиз таниш я. Журналистикадин рекьяйни кьетlен бажарагъни тежриба авай пешекардин макъалаяр чна «Лезги газетдайни» датlана кlелзава.

Х.Кьасумов 1958-йисуз Стlал Сулейманан райондин Ялцугърин хуьре дидедиз хьана. Эминхуьре яшамиш жезвай Хазран Кьасумова Кьасумхуьрел «Куьредин хабарар» газетдин экономикадин отделдиз регьбервал гузва. 1973-йисалай гатlунна жуьреба-жуьре эсерар теснифзава.
Ам гьикаятдин маракь желбдай гъвечlи эсерар теснифзавай устадни я. Адан къелемдикай гьикаятдинни шииратдин пуд ктаб хкатнава: «Терезарни герек къведа» (2011-йис); «Ша, хъуьрен, дустар!» (2012-йис); «Зи гуьгьуьл, зи гьевес» (2013-йис).
Журналистикадин рекье бегьерлудаказ кlвалахзавай Х.Кьасумов РД-дин басмадин ва массовый коммуникацийрин рекьяй комитетдин, «Лезги газетдин» ва маса изданийрин гьуьрметдин грамотайрин, премийрин сагьиб я.
Агъадихъ чна «Лезги чlал» сайтдин иштиракчийрин фикирдиз гьикаятчидин юмординни сатирадин эсер гъизва.

К.КЪАЛАЖУХВИ

«Куьн ятlа, ша!»

Кериман кефияр авачиз са шумуд югъ тир. Эхирни ада хуьруьн духтурдин патав финн кьетlна.
- Духтур, им зун я атанвайди, - ракlар гатана кабинетдиз гьахьнамазди лагьана Керима, - кефияр авач, заз вуна зи гьал ахтармишнайтlа кlанзавай.
- Вуна заз багъишламиша, Керим, къе заз вун кьабулдай вахт авач, куьн зи патав пака хъша, - лагьана духтурди.
Чара хьанач, Керим кlвализ хъфена. Пакадин юкъуз ам мад духтурдин патав атана.
- Зун атанва, духтур, - ракlарин сивее акъвазна Керим.
- Вун завай къени кьабулиз жедач, Керим, - вилерин кlаникай килигна хьиз лагьана духтурди. – Заз къе тадиз фидай чка акъатнава. Куьн зи патав пака хъша.
Керим мад кlвализ хъфена, хьайивал папаз ахъайна.
- Я итим, вун гьакьван сефигь яни, духтурди «куьн пака хъша» лагьай келимадин гъавурда вун дуьз акьукь, - рахана паб. – Адаз вавай ришвет кlанзавай хьтинди я, ришвет.
Пакадин юкъуз, пуд лагьай сефер яз, Керим мад духтурдин патав хъфена.
- Духтур, чун атанва, - ракlар ахъайна лагьана Керима.
- Куьн ятlа, ша, буюр! – Алчударна Кериман гъиле авай газетдиз вил яна хьиз, лагьана духтурди. – Ша ацукь, ви гьи чка я тlазвайди?..

Хазран КЬАСУМОВ,
Лезги писателрин Союздин член

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.