Дидед чIалан виридалайни хъсан муаллим

Алатай йисан 13-декабрдиз “Дидед чIалай 2013-йисан виридалайни хъсан муаллим” конкурс тешкилунин ва кьиле тухунин жигьетдай приказ акъуднай. Адан бинедаллаз конкурсдин положение кьабулнай, тешкиллувилин комитет ва жюри, конкурсдин эхиримжи пай кьиле тухун патал сметани тайинарнай. И Положенида а конкурс тешкилзавайбур РД-дин ва илимдин образованидин министерство, халкьдин образованидин работникрин профсоюздин республиканский комитет, Дагъустандин муаллимрин пешекарвал хкаждай институт (ДИПКПК), Дагъустандин А.А.Тахо-Годидин тIварунихъ галай педагогикадин илимдинни ахтармишунрин институт тирди къалурнавай. Конкурсдин макьсад республикада дидед чIаларай зегьмет чIугвазвай виридалайни хъсан муаллимар тайинарун, абуруз куьмекар гун ва абурун кIвалах къейд авун, чирвилер гудай идарайра “хайи чIал” предметдин гьуьндуьрвал хкажарун, республикадин дидед чIаларай виридалайни хъсан муаллимрин тежриба машгьурун тир. Ана умуми чирвилер гудай идарайра дидед чIалай тарсар гузвай вири муаллимривай иштиракиз жезвай. Алай йисан 27-мартдилай 29-мартдалди Махачкъалада, Кировский райондик акатзавай Ленинкент посёлокдин 35-нумрадин гимназияда адан эхиримжи пай, финал кьиле тухвана. Ана санлай республикадин вири миллетрин векилри: чкайрал-районра сад лагьай чкаяр кьур дидед чIаларай виридалайни хъсан муаллимри иштиракна. Дидед чIалай виридалайни хъсан муаллимвилин тIвар къазанмишун патал иниз 30 кас атанвай. Абурун арада Хасавюрт райондин Къурушрин хуьруьн 1-нумрадин юкьван школадин кьилин категория авай Дагъустандин лайихлу муаллим Гьажибала Къазиев, Сулейман-Стальский райондин Герейханован юкьван школадин муаллим Шамсудин Магьамдаровни авай. 27-мартдиз конкурс ачухаруниз талукьарнавай шад меярекат хьана. Анал ДИПКПК-дин ректор Шагьрудин Шагьова, РД-дин просвещенидин ва илимдин министерстводин векилрини иштиракна. КIватI хьанвайбурун вилик РД-дин просвещенидин ва илимдин министерстводин кьилин пешекар-эксперт Хадижат Алиева рахана. -Конкурсдин эхиримжи пай и школада кьиле тухун дуьшуьшдин кар туш. Ина вини дережадин пешекарвал авай муаллимри зегьмет чIугвазва. И школада садвилинни дуствилин, сад-садан гъавурда акьунинни сада-садаз куьмек гунин, къенивилин ва масадан дердиникай хабар кьадай коллективди кIвалахзава. 35-нумрадин гимназиядихъ гзаф агалкьунар ва гъалибвилер ава. Ихьтин виниз тир нетижаяр къазанмишуник адан директор Чакар Межидовадин лайихлу пайни ква,- къейдна ада. - Халис муаллим датIана вичини чирвилер къачузвай, вичихъ авай чирвилер гъавурда акьадайвал ва итижлудаказ масадаз гуз алакьдай, муаллимвилин девлетлу тежриба патав гвайбурухъ галазни пайиз алакьдай кас я. Дидед чIал сифте нубатда чи ата-бубайрин, чи диде-бубайрин чIал тирди, гьавиляй жуван диде-буба, жуван хайи халкьдин адетар ва культура кIани касдиз хайи чIал чизвайди къейдна ДИПКПК-дин ректор Шагьрудин Шагьова. - Шад жедай карни ам я хьи, и конкурсда чпин яшар 70 йисарив агакьнавай, кIвалахдин еке тежриба ва стаж авай муаллимрини иштиракзава,-алава хъувуна ада. Конкурсдин финал пуд юкъуз давам хьана. Ам 4 паюникай ибарат тир: “Самопрезентация” (яни муаллимди школада кьиле тухузвай вири кIвалахрикай: тарс тухуникай, диде-бубайрихъ ва тарсарилай къецяй кьиле тухузвай мярекатрикай гегьеншдаказ лугьун), “Муаллим-предметник” (яни кьвед лагьай юкъуз гьар са иштиракчиди дидед чIалай ва я литературадай аялрихъ галаз тарс кьиле тухвана), “Предметдай тарс кьиле тухун”, “Классдин сят” ва “Диде-бубайрин собрание”. И вири паяриз кьиле РД-дин просвещенидин ва илимдин министрдин заместитель аваз тайинарнавай “ЧIехи жюриди” гьар юкъуз къимет гузвай, баллар эцигзавай, абур цлал акъудзавай. “Классдин сят” ва “Диде-бубайрин собрание” паюна 1-чка къазанмишай муаллимриз “Дагъустандин образованидин отличник” удостоверенияр гана. Ахпани абурун арада 1-чка кьур касдиз “Дидед чIалай 2013-йисан виридалайни хъсан муаллим” тIвар гана. Шад жедай кар ам я хьи, и конкурсда чи ватанэгьли, Герейханован хуьруьн юкьван школадин муаллим Магьамдаров Шамсудин Шихкеримовича цIинин йисан лап хъсан муаллимвилин виниз тир тIвар къазанмишна. Муаллим Гьажибала Къазиев и конкурсда иштиракайвилин удостоверенидиз лайихлу хьана. Ам Къурушрин школайрин муаллимрикай ихьтин серенжемда эхирдалди иштиракай ва удостоверение къазанмишай сад лагьай муаллим я. Мубаракрай!

Рагнеда Рамалданова
Лезги газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.