Перейти к основному содержанию

Лацу дагъдал пайдахнава зи рикlи!

Алимурад СтIурви ва Келентер Келентерли. Абур кьведни са-1933-йисуз, са хуьре - СтIура дидедиз хьана. Сад февралдиз, муькуьдини мартиниз. Кьисметди кьведни “стIурвийрин шегьер” КIеледиз -муаллимвилин институтдиз акъудна. Жегьилрин рекьер гьа инлай чара хьана. Сад-Келентер чIехи Семед Вургъунан меслятдалди поэзиядин рехъ хкягъна Бакудиз акъатна, муькуьд-Алимурад муаллим хьиз хайи хуьруьз хтана.
Чаз-"КцIарвийриз" гьамиша "Алимурад халу" тир Алимурад Шагьмурадова гележегдин вири кьисмет тайин авур и легьзедикай "гьайиф" лугьуз рахадай. Келентер кьван машгьур тахьайвиляй ваъ, рикIевай гьиссер шиирриз элкъуьрдай мажал жагъурнач лугьуз. Гуьгъуьнай политехникадин институт куьтягьна чара-чара идарайра жавабдар везифайрал кIвалахнатIани, вичин асул алем поэзия тирди геж-уьмуьрдин 70-яшара кьатIанай ада. ГьакI тирвиляй ада вичин сифте ктабдал  "Пудкъад йисуз рахун тавур къелем" тIвар эцигнай.
Хьайи чIал хьиз Азербайжан чIални хъсандаказ чидай Алимурад СтIурвиди са куьруь вахтунда поэзиядин хъсан чешнеяр арадал гъана, чи литературада вичиз махсус гел туна фена.
Агъадик чна шаирдин са шумуд шиир куь ихтиярдиз гузва.

 

Я зун

Къваз тавуна йифиз-юкъуз авахьна,
Мурадарив агакь тавур яд я зун.
Зун тахьайтlа зун хьиз кайид амукьдач,
Дуьнядилай финиз гьеле фад я зун.
Фелекди зун зелилбуруз юлдашна,
Дуьняди заз душманвилив тамашна.
Берекатар гарар-марфар тарашна,
Агакьнаваз кlватl тахьай са гад я зун.

Писвал авун хъсанвилиз жаваб я,
Садаз гунагь, садаз и рехъ суваб я.
Дуьняд крар сад дуьз ятlа, вад таб я,
Зазни чидач дуьняда квел шад я зун.
Фелекди заз дуьня гана, пай ганач,
Гьарайна за- дустарини  гьай ганач.
Зи гъилевай муьгьуьббат заз тай хьанач,
Муьгьуьббатди етим авур сад я зун.

Бахтарикай сад якьуна, вад квахьай,
Уьмуьрдикай са югъ, са йиф шад тахьай,
Дердерикай виш чуьнуьхна сад кхьай
Гагь Сизиф я, гагь Алимурад я зун...

         Алакьнач

Мурадарив агакьайла жаванар,
Югъ куьруь йиз кlан хьана заз, алакьнач.
Жанавурни хеб са-садав туькlуьрна,
Кьвед санал хуьз кlан хьана заз, алакьнач.
Дуьняд нямет виридаз пай авуна,
Ажуз, къудуз са-садаз тай авуна,
Етим авай кумада цlай авуна,
Рагъ мукьув гъиз кlан хьана заз, алакьнач.

Вучиз хьана и гишинбур, яванар?
Сад Аллагьдив авуна за дуванар.
Дуьня туна суруз физвай жаванар,
Рекьинкай хуьз кlан хьана заз, алакьнач.
Вучиз дуьня икl са-садак какахьна,
Етимрин дердер-гъамар алахьна.
Агакьнавай къуьлуьн никlер акахьна.
Вахтунда гуьз кlан хьана заз, алакьнач.

Кьакьан дагъдиз тамашзавай тепедиз,
Куьлгедик квай гардан шуькlуь цуькведиз,
Вичелай фад бала кьейи дидедиз,
Шиир кхьиз кlан хьана заз, алакьнач.

    Чlуру кlалам

Сару сим алачиз хам устардив гваз,
Межлисдиз аватай тар я, тахсиркар,
Сегьрадиз алатай Межнун дили туш.
Вафасуз акъатай яр я, тахсиркар.
Гьалал гьарам хьана, гьарам шейер нуш,
Дидедлай вад- цlуд кам вилик фена руш,
Тербия кесиб хьун дуьняд гунагь туш,
Аял базардиз фей къар я, тахсиркар.

Са фикир тагана жедай крариз,
Майдан гана чна тахьай гарариз,
Чlуру кlалам ягъана къени тарариз,
Лугьумир чlуруд гай тар я, тахсиркар.
Пилид гъиле гана чи булах, чи яд,
Ватан шад тахьайтlа, миллет жедач шад,
Тахайди диде туш, ферсизди велед,
Ферсизди ийидай кар я, тахсиркар.

Кьабулна "дустари" чун тур кlалубар,
Худ хьай казинояр, буш хьай клубар
Гьахъ хьана урусди кхьей улубар,
За кхьей и кьуд-вад цlар я, тахсиркар.
Чи пуд рангад пайрагъ чна виниз кьан,
Тексундилай калин гъери михьиз кьан.
Патахъай гар къведай рекьер кlевиз кьан,
Чид тушиз, чаз къведай гар я, тахсиркар.

  Ама дуьняда

Кьуьзуь дуьня, ви уюнар чир жедач,
Дирид фена, кьийид ама дуьняда.
Бахтунин чарх дуьз патахъ элкъуьр жедач,
Кана кабаб хьайид ама дуьняда.

Фелекди чаз дили кьисмет кхьана,
Зайифбурув залан парар вугана.
Кlеви къванер цlуру хьана чкlана,
Къванжалайни къийид ама дуьняда.
Кесиб дуьня бала етим таз фена,
Залумарни зулумдайбур къвез фена.
Акьуллубур дуьнядилай шез фена,
Акьулдикай кимид ама дуьняда.

Дили уьмуьр муг амачир къуш хьана,
Садаз зегьер, садаз дуьня нуш хьана.
Бала жейран гъуьрчехъандал туш хьана,
Яд ягъида хайид ама дуьняда.

Алимурад, вун ама, велед фена,
Ви уьмуьрдиз кьуьд атана, гад фена.
Цlуру Межнун дуьнядилай фад фена,
Межнунарин цlийид ама дуьняда.

   Вучиз я?

Кьисметар гай кьуьзуь фелек,
Ви дердер залан вучиз я?
Са дидеди нек гана хвей
Стхаяр душман вучиз я?
Гьар четинвал эхи авур,
Веледар хуьз чlехи авур.
Чlулав чlарар рехи авур,
Дидеяр пашман вучиз я?

Сад багьа я, сад я пулсуз,
Сад къиметлу, сад я ужуз.
Сад зайиф я, сад я къудуз,
Къудуздаз майдан вучиз я?
Уьмуьр куьруь са гагь ятlа,
Гахъсузвалун гунагь ятlа,
Вун кьведазни гъуцар ятlа,
Сад нуькер, сад хан вучиз я?

Чаз гай паяр масан гана,
Бязибуруз хъсан гана,
На дуьнядиз инсан гана,
Иблисни шайтlан вучиз я?
Дерт кесибда эхиз хьайла,
Сад гужлу, къад ажуз хьайла,
Стхад стха рекьиз хьайла,
Дуьняда инсан вучиз я?

Дердер чlехи, мурад гъвечlи,
Хизан пара, суфра ичlи,
Акьуллудаз дуьня мичlи,
Сефигьдаз девран вучиз я?
Намуссузди къудузарна,
Диден буба ужузарна.
Кьуьзуь кьиляй ажузарна,
Ажал къвердал тан вучиз я?

      
      Стlур

Чи ватандин михьи гьава,
Дагъдай къвезвай гар я Стlур.
И дуьняда хуьр парава
Виридалай иер я Стlур.
Са пад Крар, са пад Лацар
Вилин нагъв хьиз михьи вацlар,
Дили гъерчер, дагъдин яцар,
Ваз ганвай паяр я Стlур.

Ви цуьквер дердин дарманар,
Кими хьай туш ваз мугьманар,
Михьи нек хъвай ви жаванар,
Дуствилиз пайгар я Стlур.
Лап женнетдиз жеда ухшар,
Уях хьайла дагъдин къушар
Къветер хьтин фере рушар,
Гадайрин бахтар я Стlур.

Ви булахар земземдин яд,
Ви велед я Алимурад.
Зи чандавай чlехи мурад
А ви михьи тlвар я Стlур.

 Дамахзава зи рикlи

Килиг ийиз дидед хайи Ватандиз
Секин-секин кlвалахзава зи рикlи.
Къайи цикай нуш хьанавай зи чанда,
Шербет авай булахзава зи рикlи.
Зи Ватанда санал мискlи, санал пlир
Экъвезава дагъда жейран, чуьлда къуьр.
Цуьквед кьуна нур гузавай хайи хуьр,
Са женнетдиз уртахзава зи рикlи.

Заз дагъ ава цаварихъди галкlанвай,
Ам Шагьдагъ я, Аллагьди заз ганавай,
Ватандикай цуькведивди диганвай
Са гуьлуьшан яйлахзава зи рикlи.
Хпен патав бицlи келе кьуьлзава,
Дагъдин хурай  заз чубанди гъилзава,
Фад гъваш лугьуз мугьманрини вилзава,
Нек акайна къаймахзава зи рикlи.

Ватан хуьнин бурж  алайд я инсандал,
Бурж пара я веледарин хъсандал,
Заз Стlурни Самур гайи Ватандал,
Йифиз-юкъуз дамахзава зи рикlи.
Зид я дустар кьабулдай къайи булах,
Тар авачиз цуькведикай дуьз хьай багъ,
Зи дагълариз мугьман атай цlийи дагъ-
Лацу дагъдал пайдахнава зи рикlи!

Кцlар газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.