Зун Ватандихъ вилер кузвай са къуш я,
Куьз лагьайтIа, Ватан зи рикI-жигер я...
Чи литературада, журналистикада "Муьшкуьрви" тахаллус алаз мили шииррин, хци пародийрин, объектив рецензийрин, чIалан проблемайриз талукь макъалайрин хъсан чешнеяр арадал гъанвай Вакъиф Гьажагъаев асул хьиливи я.
Пединститут акьалтIарна вичин уьмуьр Худатдихъ - чи дегь макан Муьшкуьрдик галкIур авур патриот-педагог, галатун течир тешкилатчи, хъсан дуст, са гафуналди зегьметчи инсан тир Вакъиф муаллим ина гьуьрметдин сагьиб, сейли ватандаш хьанва.
Худат шегьердин юкьваллай зурба Културадин сарайда Хачмаз райондин крар кьилиз акъуддай властдин, културадин ва туризмадин, гьакIни образованиедин отделрин тешкилатчивилелди кьил кьур адан 60 йисан юбилейдиз муаллим-шаирдин коллегаяр, къелемдин юлдашар, дустар, муьква-кьилияр, къуншияр, сеняткардин шиирар кIани, къилихар бегенмиш тир сая инсанар атанвай.
Межлис тухун хиве кьуна вични миссия вижеваз кьилиз акъуддай шаирдин телебевилин дуст Шихжамал Шихметова Вакъиф Муьшкуьрвидин яратмишунрикай, райондин културадин уьмуьрда авур гзафбуруз чешне жедай хийирлу крарикай рахана:
- Ам яратмишунрив гьеле мектебдин йисарилай машгъур жез эгечIнатIани, шииррин чIехи са пай студентвилин йисара арадал гъайибур я. Вичи хиве кьазвайвал туькуьрунрин шегьредал акъатунин рекье кхьираг-шаирар Юсиф Гьажиевахъ, Забит Ризвановахъ, Байрам Селимовахъ, Иззет Шарифовахъ, Ядулла Шейдаевахъ галаз авсиятри, а ксарин меслятри чIехи таъсир авуна.
Пешда тара гьар
гатфарин сифтедай,
ТIурунавай уьмуьрд
пешер-жегьилвал...
Жегьил студентдин и цIарар кIелай чи талантлу шаиррикай сад тир рагьметлу Эгьмедбег Шихкъайибова"-Вакъифан и шиир "Жегьилвилин Гимн" я"- лагьанай.
Межлисдал гаф къачур Хачмаз Райондин Образованиядин Отделдин кIвалахдар Ялчин Руьстемова Къаражели хуьруьн юкьван мектебдин директор, тежрибалу муаллим Вакъиф Гьажиагъаеван педагогвиле алакьунрикай, жегьилриз чешне тир уьмуьрдин рекьикай рахана, юбилярдиз образованиядин кIвалахдаррин профсоюздин грамота гана.
“Кцlар” газетдин редактор Видади Севзиханова, карчи инсанар Бегьрам Залова, Уруж Уружова, шаирар Медет Эрзиманов, Забит Зекиди, Эйваз Чипирвиди Сейидмет Самуриди, Телман Теравета, журналистар Дилбер Агъаевади, Камран Аламвиди, Абир ЭчIехвиди, Зиядхан Мурадханова ва масабуру Вакъиф Муьшкуьрвидин поэзиядин, публицистикадин кьетIенвилерикай ихтилат кудна, адахъ галаз багълу рикIел хкунар мецел гъана, юбилярдиз мадни зурба агалкьунар тIалабна.
Межлисдин гуьгъуьна гаф къачур юбилярди мярекатди кьил кьуниз куьмекар гайи райондин тешкилатрин регьберриз, вири иштиракчийриз дикъет ва къайгъударвилиз килигна разивал малумарна, вичин цlийиз кхьенвай шиирар кlелна.
Юбилейдин нян манидарар Магьире Шириновади, Роза Гьажимурадовади лагьай манийри мадни гурлу авуна.
"Кцlар" газет
Добавить комментарий