Узнифатан баядар

Каъацу багъдиз яд гуда за,
Къацу векьин кIаникай физ.
Я руш, вуна рикI акъудда,
Йикъа пудра виликай физ.

Яргунарин Самбурдин яд,
Гьар дердиниз дарман ялда.
Руш кIанидаз це, чан диде,
Дуьнья вад къан мугьман ялда.

Са сумавур чай эцига,
Дили гьуьлуьн лепедикай.
Икьван кIани зун хьанач ваз,
ЦIай кьурай на лемпедикай.

Дуьз дугунай Керем фида,
РикI иширдай баяд лугьуз.
Ширасардиз Эсли къечIда,
Аман Керем, кая лугьуз.

Къизилгуьлдин яд галукьай
Синидавай лацу къендер.
За зи дердер аладарда,
Зарул-зарул лугьуз бендер.

Ич вегьена, кард ахъая,
Яргунарин багъларалди.
Хуьр лагьана хъша стха,
Рагъ акIидай дагъларалди.

Гуьзел ярдин гуьзелвиляй,
Аватналда чуьнгуьр гъиляй.
Икьван кIани зун хьанач ваз,
ЦIай кьуна куй вун зи хъиляй.


Кьакьан синел сил цада за,
Къушарин пай, къушарин пай.
За таралай ич атIуда,
Булахдаллай рушарин пай.

Къацу никIе масан ачкар,
Ви къармахар чилиз фий яр.
Икьван кIани зун хьанач ваз,
Вун яд авай гьуьлуьз фий яр.

Ирид дагълар ирид жалгъа,
Са жалгъадай къай къвезава.
За пенжердай килигайла,
Несиб тахьай яр физава.

Ичин тарар са жергеда,
Палид  тара санжах ава.
Гъил къачу и кIурадилай,
Заз цIувад яш гьанжах ава.

Кьулан вацIал кьуларин муьгъ,
Кьуларилай яд алахьиз.
За стхадиз чар кхьида,
Кьве вилелай нагъв авахьиз.

Вили цавуз мих ягъада,
Къизил санжах галкIуй лугьуз.
За Аллагьдиз дад ийида,
Масан стха хтуй лугьуз.


КIвалин кьулухъ къарбудин тар,
Къариб къушар къвез ацукьда.
Стха рикIел акьалтайла,
Яйлух кьуна шез ацукьда.

Къаз къацуда, къаз къацуда,
Къацавай руш вуч лацуда.
КIвалар-малар вири гана,
Къацавай руш заз къачуда.

Чаз кьве вахаз са фите гъваш,
Пешер алай жунадикай.
Чаз кьве вахаз са сур атIутI,
Рагъ гецифай гуьнедикай.

Кьакьан дагълар кьакьан хьурай,
Дагъустанар аквадайвал.
Мумад хциз мад са руш хьуй,
ЧIехи хьайла заз гъидайвал.

Билбилди хьиз чIал ахъайна,
Шезвай баяд хуравай яр.
Дидеди гуз, бубад тагуз,
Чан аламаз суравай яр.

Са сумавур чай эцига,
Шекер квачиз хъваз тежедай.
И дуьньяда мад вучда за,
Бала амачиз къваз тежедай.


Агъа кIама са яд ава,
ХуьтIуьз, гатуз рагъул тежер.
Рушан рикIе мурад ава,
Рекьидалди лугьуз тежер.

Я Яргунар, я Шихжинет,
Ярдин рекьер хьана къуба.
Зи гаф хуьруьз чукIурай руш,
Вав сир вугун хьана туба.

Куьлуьз-куьлуьз чиг къвазава,
Цуьлер авай арабадиз.
Цаварилай цIай аватрай,
Чи душманрин харапIадиз.

Хъархъун тара къачагь ава,
Гьиле цудай валчагь ава,
Валчагъдавай куьлуь буьзме,
Кьардин бармак алай йезне.

Вили цавар дамар-дамар,
УшкIуь юкьва къизилд камар,
Куьлуь-куьлуь камар къачуз,
Гьиниз фида гуьл бахтавар?

Шилесарар кьиляй-кьилиз,
Зулуз жедай уьзуьмар я.
Гурбагур хьай душманри чи
Чаз авурди зулумар я.

ЧIулав цIарар, лацу чарар,
Табарак хьуй, табарак хьуй.
Чан дидедин рикI алай хва,
Ваз гъизвай свас мубарак хьуй.


Истиканар чуьхуьдайла,
Са истикан хана завай.
ТакIан вакIан уьлчуь тайла,
Къведа лугьун хьана завай.

Нехирбандин цIару чанта,
Таза ниси бул я гада.
Хеб яйлахдай эвичIнава,
Мехъерардай зул я гада.

Экуьнилай рагъданалди
Гвен гуьда за буфа-буфа,
Гьайиф тушни бубад кIвале.
Яр галачиз чIугур жафа?

Хуьруьн гьалар какахьнава,
Ана авайд йикьни-шуван.
Сур ахъайна килигайла,
Суравайди жегьил-жаван.

За манияр лугьудай туш,
Захтияр я, захтияр я.
За зи гафар ваз лагьана,
Игила ви ихтияр я.

Таран хилел къушар ала,
Гьуй лагь рушар, гьуй лагь рушар.
Куьн гадайриз кIан хьайила,
Ваъ лугьумир, хьуй лагь рушар.

“Самурдин” экспедиция

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.