Къад лагьай мах

ТАМА ТАРНИ ТЕК ТАХЬУРАЙ 

Кьуьл чидайди акъваздач 
Кьуьл тавуна мехъерик. 
Гъарик1 жеда жегьил руш 
Къизилгуьлдин цуькверихъ. 

Булахдикай кьил къачур 
Вац1ара яд жедачни? 
Метлеб кьилиз фейила, 
Кьегьалар шад жедачни? 

Авачирт1а Кас-Буба, 
Чир жедайни кайибур, 
Яргъарани мукьвара 
Ватан патал кьейибур? 

Рехи хьанваз Кас-Буба 
Къекъвезва мад рекьера. 
Ада лагьай манияр 
Гьахьзава мад рик1ера. 

Хажалат гваз ксанвай 
Дидед сурал Шарвили. 
Рик1 сугъул яз, ксанвай 
Адан хурал Шарвили. 

Галатнавай беденда 
Къайи шагьвар акьуна. 
Гьа ксанвай чкадал 
Адаз ахвар акуна. 

Са пагьливан къвазнава, 
Къилав гана сарариз, 
Яру хине, алахъна, 
Ягъиз вичин ч1арариз. 

Вилер адан – ярубур, 
Сив, т1еквен хьиз, ахъа тир. 
Гъилер – вечрен тапасар, 
Келле ч1ехи такъа тир. 

Хъуьрезва ам яргъалай, 
Ч1улав сарар экъисиз, 
Гьазур жезва вичин тур 
Шарвилидал илисиз. 

Акъвазнава суьгьуьрчи, 
Шармуну хьиз, къая хьиз. 
Зурзазва ам гар акьур, 
Маркуналлай пая хьиз. 

Вичин, ч1улав ч1ар алай, 
Гъилер гъизва виликди. 
Суьгьуьрдин ц1иб зегьерлу 
Эцигзава кьилихъди. 

Ягьсуз-ягьсуз хъуьрезва 
Шарвилидал а гьайван, 
Алахънава вижеваз 
Суьгьуьрда тваз пагьливан. 

Вири кьушун к1ват1 хьана, 
Гапуррай ц1ай акъудиз, 
Рекьин патал Шарвили, 
Халкьарай ван акъудиз. 

Ракьун крчар алайди, 
Зат1ни такваз вилериз, 
Гьазур хьанва ягъиз ц1ай 
Вири лезги хуьрериз. 

Шейт1анарни иблисар 
Сад кисиз, сад хъуьрезва, 
Ч1урал к1евиз ксанвай 
Игитдилай элкъвезва. 

Шарвилиди турунал 
Вегьей ч1авуз вичин гъил, 
Гьатна адан капашда 
Чиг ацукьай къайи чил. 

Къудгъун хьана ам к1вачел, 
Ягъайди хьиз ц1апанди. 
Тур амачир, патав гвай, 
Ахварал фей инсандин. 

Ам тухванвай алчахри, 
Угъривал куьз герек я? 
Тур гвачирла, Шарвили 
Лугьуз жени зирекди? 

Чуьллерал вил вегьена, 
Килигна ам кьуд патаз. 
Душманрин бул кьушунар 
Акъвазнавай чил гатаз. 

Шарвилидин гъилера 
Къуват, дагъ хьиз, дак1уна. 
Вичин вири душманар 
Гьазур хьанваз акуна. 

Гапуррини жидайри 
Ц1арц1ар гузвай ракъинал. 
Вил алай къе душманрин 
Шарвили тек рекьинал. 

Шарвилиди гьарайна, 
Вичиз чидай жуьреда: 
- Гъалиб хьайид эхирдай 
Адет ава хъуьредай. 

Зи тур куьне чуьнуьхна, 
Къуват ама гъилера. 
Къван эцигдай ц1апандал 
Къудрат ама гъилера. 

Зак зи чилел дуьньяда 
Масадан т1ем акакьнач. 
Садалайни, душманар, 
Зун магълубиз алакьнач. 

Ксанвайла, вучиз зи 
Тур тухуз куьн к1убан я? 
Ик1 яшамиш жедалди, 
Кьиникь виш пай хъсан я. 

Тек ят1ани майдандал, 
Зи далудихъ эл гала. 
Кич1е туш заз зеррени, 
Зи халкьдин вил зал ала! 

Ик1 лагьана, виликди 
Кам фена, вич вичелай. 
Гьяркьуь къуьнер юзурна, 
Гъил алтадна кьилелай. 

Кьуна яха душмандин 
Вичин зурба гъилерив, 
Хкажна ам, агудна 
Шалбуз-дагъдин синерив. 

Ахпа ада гьужумна 
Муькуьбурун винелди. 
Чинеруг хьиз, фена ам 
Амайбурун кьилелни. 

Шарвилидал гьужумна 
Мефт1еда т1ал авайда. 
Шарвилидал гьужумна 
Ивида звал авайда. 

Сагъ са юкъуз давамна 
Дяве, инсаф авачир. 
Мергьеметни инсанвал 
Гьич рик1елни алачир. 

Муькуь йикъан пакамахъ 
Гьай акъатна майдандай. 
Муькуь йикъан пакамахъ 
Вай акъатна майдандай. 

Пуд лагьай югъ алукьна, 
Т1имил хьанач душманар. 
Пуд лагьай югъ алукьна, 
Кими хьанач душманар. 

И вахтунда чиликай 
Мад са душман хкеч1на, 
Михьна вичел алай руг, 
Дяве ийиз эгеч1на. 

Эвер гана кьушунриз, 
Вичиз куьмек гун патал, 
Эвер гана кьушунриз, 
Шарвили вич кьун патал. 

Хкатна фад чиликай 
Кьилел хъцикь алайди: 
- Ваз чизвачни, Шарвили, 
Захъ ирид чан авайди?! 

Алт1уш хьана, т1вет1ер хьиз, 
Шарвилидал душманар. 
Аруш хьана, вет1ер хьиз, 
Шарвилидал душманар. 

Ирид юкъуз турарай 
Ц1ай чк1ана дагълариз. 
Ирид юкъуз ц1апанрин 
Гьай чк1ана дагълариз. 

Ивийрикай сел хьана 
Дерин, мич1и к1амара. 
Лешерикай дагъ хьана 
Гегьенш, ич1и к1амара. 

Акъатай руг чилерай 
Хкаж хьана циферихъ, 
Яваш хьанач дявеяр, 
Пай кутуна йиферик. 

Шарвилидал хьанвачир 
Гьелелиг гьич са херни, 
Килигзавай душманриз 
Ам, хъвер ийиз уьтери. 

И вахтунда душманрин 
Ч1ехибуру, к1ват1 хьана, 
Шарвили гьик1 кьадат1а, 
Веревирдна, сад хьана. 

Са шейт1анди лагьана: 
- Чида заз сир къучагъдин. 
Адан къуват, адан гуж 
И чилив гва, хьурай кьин! 

Эгер к1вачер чиликай 
Хкудайт1а, ам яваш 
Жедайди заз хабар я, 
И к1валахдиз гаф авач! 

Тади гьалда къурмишна 
Душманди и фенд-амал. 
Са майдандал ич1ирна 
Харар авай ц1уд чувал. 

Лагьана фад кьегьалдиз: 
- Ша, дявеяр акъвазрин, 
И кьиникьар, ягъунар 
Чна чавай яргъазрин. 

Баришугъдин шарт1арал 
Чун гьамиша рази я. 
Саламатвал, ислягьвал 
Инсан патал рузи я. 

На къалурна чаз гьайбат, 
Шарвили, ви гъилерин. 
Гила вуна иервал 
Къалура куь кьуьлерин! 

Са легьзеда секинвал 
Гьатна ч1ехи майданда. 
Экъеч1на са виш гада, 
Намус авай вижданда. 

Зуьрнечийри «Лезги руш» 
Яна къати гьиссерал. 
Далдамчийри «Лезги руш» 
Яна векъи сесерал. 

Хкадарна, Шарвили 
Анин юкьвал экъеч1на, 
Дагъ къарсуриз, мурк1ар хаз, 
Туьнт кьуьлериз эгеч1на. 

Ц1уьдгъуьнна к1вач гзаф пис, 
Алукьна ам бейхабар. 
Тадиз адаз душманри 
Кьуна рик1е авай кар. 

Фендигар са усалда, 
Яна игит дабандай, 
Лагьана: - Ик1, бейниван, 
Чна къе ви дуванда! 

Вич зайиф жез акурла, 
Ада к1евиз гьарайна: 
- Ша т1ун, ша т1ун куьмекдиз, 
Зун душманри гъарайна! 

Гьисабдин сан авачир 
Хирер хьана бедендал, 
Ивидикай авахьай 
Хуьлер хьана Гавдандал. 

Ярхар хьана алайла 
Векьин юкьвал Шарвили, 
Зверна, фена душманар, 
Рекьин патал Шарвили. 

Шарвилиди гьарайна, 
Вичиз куьмек це, лугьуз, 
Жезва, эллер, килига, 
Эхир нефес къе, лугьуз. 

Агъзур жегьил, ц1аяр хьиз, 
Атана дагъ галайнихъ, 
Рик1из к1ани Шарвили 
Дарда гьатна лагьайнихъ. 

Тадиз фена, агакьна 
Абур вагьши душмандив. 
Тадиз фена, агакьна 
Абур пехъ шейт1анрив. 

Кьуд патахъай эгеч1на, 
Ягъиз, рекьиз, асланар. 
Кьуд патахъай эгеч1на, 
Чухваз-кик1из душманар. 

Ахъайна рехъ арадай, 
Там хьиз къалин, кьушундин, 
Са легьзеда вахчуна 
Чи Шарвили алай син. 

Кьуна абуру Шарвили, 
Чимиз-чимиз, къужахда. 
- Гьат тавурай, - лагьана, -  
Им душмандин къармахда! 

Чандик квай касс, пагьливан, 
Кьуна, фена дагъларихъ, 
Вини Шагьдин к1аник квай 
Магъарадин рагарихъ. 

Ирид юкъуз къекъвена 
Душманар Шарвилидихъ. 
Ирид юкъуз къекъвена 
Шейт1анар Шарвилидихъ. 

Санайни гьич жагъанач 
Абуруз зирек Шарвили. 
Санайни гьич жагъанач 
Халкьдин дирек Шарвили. 

И йикъалай гьамиша 
Пашман хьана душманар. 
А йикъалай халкьариз 
Душман хьана душманар. 

Шарвилиди хъиткьерда 
Явашдиз вил ахъайна. 
Хвеши хьайи игитри 
Адан гевил ахъайна. 

Ингье, ада лагьана: 
- Рекьизва зун, стхаяр, 
Рагъ хьиз, фена дагълара 
Ак1изва зун, стхаяр! 

Къарагъ, к1вализ ахлад куьн, 
Эллер есир тахьурай, 
Зун и гьалда гьатай ч1ал 
Садазни чир тахьурай. 

Куьн алахъа инсанрин 
Рик1ер даим шад ийиз. 
Куьн алахъа эллерин 
Рекьер вири сад ийиз. 

Лазим хьайи юкъуз зун, 
Гьазур я куь къуллугъдал, 
Дарда гьатай береда 
Жеда халкьдин буйругъдал. 

Халкьдин фикир сад хьурай, 
Рик1ин мурад фад жеда. 
Маса чара амач квез, 
Сад хьайит1а, шад жеда. 

Дарда гьатай ч1авуз заз 
Пуд сеферда гьарайрай. 
«Шарвили, фад агакьа!» -  
Лагьана зи суракьрай. 

Ик1 лагьана, Шарвили 
Фена ламу накьварал. 
Ик1 лагьана, Шарвили 
Фена к1евиз ахварал. 

Ирид юкъуз ацукьна, 
Игитри мад фикирна, 
Ахпа ирид юкъузни 
Хъиткьердин сив к1евирна. 

Хуьрера ван къекъвена, 
Кьенва лугьуз Шарвили. 
Ваъ, кьенвач ам, яргъариз 
Фенва лугьуз Шарвили. 

Мусибатдин ван хьана, 
Шекер, экв хьиз, туьхвена, 
Мад жейрандиз элкъвена, 
Дагълар тирвал къекъвена: 

- Шарвили, чан Шарвили, 
Рик1ин дарман Шарвили, 
Ваз Шекеран, ви ярдин 
Къвезвани ван, Шарвили? 

К1вале ялгъуз туна зун, 
Вун яргъариз фенани, 
Чарадакай кьуна яр, 
Зи ашкъи на кьенани? 

Акатнани, тахьайт1а, 
Турун кьил вак душмандин? 
Акьунани, тахьайт1а, 
Ч1уру вил ва шейт1андин? 

Ирид йисуз хвена за 
Ви рекьер кьве виливни, 
Тахсирар зал алат1а, 
Сура тур ви гъиливди! 

Хуьзва Шекер умудди, 
Ам сак1ани рекьизвач, 
Суракьзава Шарвили, 
Ам санайни жагъизвач. 

Кас-Бубади манияр 
Лугьузва чи эллериз. 
Шарвилидкай хкетар 
Тухузва чи хуьрериз: 

- Сад хьайила рик1ер чи, 
Хквервал я Шарвили, 
Чи виридан бахтунихъ 
Гелкъвервал я Шарвили!

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.