Жедай туш

Хун тавур цал кIвалин къеняй, 
Къецелай гьич хаз жедай туш. 
Чинал шад яз, пехил рикIяй, 
Касдикай дуст кьаз жедай туш.
 
Ичин тарцел анар, чуьхвер, 
Алаз къведай гад жедай туш. 
Дустунин дерт залан тежер, 
РикI авай гьич сад жедай туш.
 
ГьакI кIанивал рахадайдан,
Кьве мез сиве вич жедай туш. 
Вилик чан гуз, кIасиз дабан, 
Кьве чин алаз гьич жедай туш.
 
Гьар жуьредин ава къилих, 
Синих квачир сад жедай туш. 
На хуьналди халкь, чIал, тарих, 
Душманар гьич шад жедай туш.