Алай йисан 21-февралдиз Къебеле райондин Камарван хуьруьн юкьван мектебда кьиле фейи дидед чIалан йикъаз талукьарнавай мярекат акьван гурлуди, акьван руьгь кутадайди, акьван иерди хьана хьи, ам садрани чи рикIелай алатдач. Мярекатда Къебеле шегьердай атай мугьманрини иштирак авуни адан метлеблувал хкажзавай. И сувариз чаз – «Самур» газетдин кIвалахдарризни теклифнавай.
Сятдин 11-даз чун мектебдиз агакьайла и чирвилерин кархана халисан суварин гьавада авай. Муаллимрини милли пекер алай аялри чун залдиз тухвана. ГъвечIи-чIехидан вирибурун чина хъвер къугъвазвай. Лезги макьамрин ванери рикI ахъайзавай. Мярекат тухузвай жегьил муаллим Сабира Уьзбеговади гаф мектебдин директор Бехтияр Алияроваз гана. Ада виридаз чIалан сувар мубаракна. Завуч Гьуьммет Уьзбегова – вичихъ шаирвилин алакьунар авай и касди лезги чIалал лагьай «Дидед чIал» шеирди межлисдал чан гъана. Шаир Желил Комрадлыдини и гъилера лезги чIалал шиир кIелна. Райондин маарифдин идарадин пешекар Расим Байрамова тешкилатчийриз агалкьунар тIалабна.
Вич Камарван хуьряй тир, Къебеледин тIвар-ван авай духтур, и мярекат тухун патал гзаф алахъунар авур Шагьисмаил Исмаиловни адан уьмуьрдин юлдаш Гуьлейфе муаллим мярекатдиз гъил ичIиз атанвачир. Абуру мектебдин лезги чIалан кабинет патал чпин хизандин тIварцIелай ктабрин шкаф къачуна пишкеш яз гъанвай. «Самур» газетдин Къебеле районда чIехи даях тир элдин агъсакъал Ш.Исмаилова авур рахунар виридан рикIяй хьана.
Ахпа межлис мектебда кIелзавайбуру чпин гъилиз къачуна. ЯхцIурни цIудалай гзаф аялри иштиракзавай программа акьван марагълуди тир хьи, чавай чи гьейранвал чуьнуьхариз жезвачир. Абуру кIелзавай шииррай, фадлугьунрай, къалурзавай сегьнейрай лезги чIалаз чIехи муьгьуббат кIвахьзавай. Суьгьбет Агъасиевади хордихъ галаз санал «Дидедин чIал» мани лагьайла, рушарини гадайри «Сад за лугьун, сад вуна лагь» лугьуз баядрал илигайла, Азизани Айтекина «Чан къари» макьамдин бинедаллаз сегьне къалурайла, гадайри «Лезгинкадал» кьуьлердайла вирида гурлу капар ягъизвай.
Чун ина гзафни-гзаф гьейран авур са карни хьана: шииррин конкурс. ЦIуд аялди иштирак авур ам хъсандиз кьиле фена. Лезги шаиррин шиирар и аялри акьван фасагьатдиз лугьузвай хьи! Гъалибар хкягъун муаллимрикай ибарат жюридиз са акьван регьят хьаначтIани, I чкадиз Гуьлшен, II чкадиз Фидан ва Сельми, III чкадиз Нигар, Айтекин ва Бану лайихлу хьана.
Абуруз пишкеш яз и макъаладин авторди вичин лезги чIалал акъуднавай ктабар гана. Тек гъалибриз ваъ, мярекатдик пай кутур вири аялриз сад хьиз вичин ктабар пай гайи ада абурун алакьунрал вичин гьейранвал малумарна.
Аялри мярекат акьван хъсандиз туькIуьрнавай, вири чпиз акI муьтIуьгъарнавай хьи, чна – яшлубуру абурун вири тIалабунриз амал авунай. Гьа икI, абуру чун рахурна, чав кьуьлериз туна, ахпани чал суалрин марфар къурна. И суалриз жавабар лагьайтIа, абуруз «Самур» газетдин редактордивай кIан хьана. Чи халкьдин тарихдиз, чи чIалан гьалариз, мектебра лезги чIалал тарсар тухуниз, дуьньядин лезгийрин кьадардиз талукь тир и суалар гузвай аялрин: Элвинан, Азизан, Атабеган, Саядан, Самиран, Алинадин, Нижатан фикир-фагьумрал гьейран тахьун мумкин тушир.
Аялар и мярекатдиз гьазурнавай мектебдин тIвар-ван авай муаллим, виридан рикIе лезги чIалаз муьгьуьббатдин экв куькIуьрзавай Ругьизер Алиевадин рахунар виридан рикIяй хьана. Адаз мярекат арадал гъиз Гуьлпери Алиевади ва Шагьане Мегьдиевади куьмек ганвай.
Мярекатдилай кьулухъ чун Ругьизер муаллимди тешкилнавай лезги чIалан кабинетдиз илифна, Шагьисмаил ва Гуьлейфе Исмаиловри пишкеш яз гъанвай ктабдин шкафда дидед чIалал сифте ктабар чна эцигна.
Ахпа вири суварин суфрадихъ ацукьна. Ширинлухар муаллимри чпин кIвалера чранвайбур тир. ЧIехи тортунин винел «Хайи чIал» гафар кхьенвай.
Чун Камарвандай Бакудиз руьгь акатнаваз рекье гьатна. Чи вилерикай датIана а аялар карагзавай. «Ихьтин гележег авай чи чIал рекьидач» лагьана фикирзавай чна.
Седакъет КЕРИМОВА.
Шикилар ягъайди Рамил Алхасрин я.
САМУР газет
Добавить комментарий