Хциз

Алахьай цIай нафт илична къизмишмир, 
Килиг, садра жувни а цIа куда, хва. 
Гьич садрани писвал рикIе битмишмир, 
Ваз Аллагьди рикI тирвалди гуда, хва.
 
Кьве мез жемир, кьве чин жемир межлисда, 
Кар галачир гаф зегьерлу илан я. 
Рекьин хеве, къияматдин силисда 
Инкир-минкир айирла ваз залан я.
 
Сада авур хъсанвал на квадармир,
Къиямат-къуз вал гунагь хьиз къвада, хва. 
Дуст маса гуз, душман вуна шадармир, 
Серф кткайла ада иви хъвада, хва.
 
Акатайдаз рикI ачухиз къекъвемир, 
Ягъамир вун хъвер къугъвазвай сумрадихъ, 
Дуст ажузди кьамир. Адал хъуьремир. 
Ацукьмир вун лайихсуздан суфрадихъ.
 
Чарадан затI, гьарам жувак кутамир, 
Лап веледрин вилерайни хкведай. 
Вун иблисдин хуш гафарихъ ягъамир, 
Чакъалар хьиз ви гуьгъуьна къекъведай.
 
Рафтар тахьуй ички лугьур жадудихъ, 
Ам иблисвал гвай душман я, ченги я. 
Эвел арха яхъ, хва, жуван далудихъ, 
Синагъ жеда дустар анжах женгина.
 
Ваз девлетар кIан жемир, хва, регьятдиз, 
Намерд дуст хьиз батIинда квахь хъийидай. 
Лайих хьухь вун зи гьуьрметдин сергьятдиз: 
Ви крарал за сурайни дамахда.