Перейти к основному содержанию

«Дагъларин накъвар»

Дагъларин накъвар

Лезги эдебиятдал кьару инсанриз шаир Бренбег Абдуллаеван тlвар фадлай таниш я. Адан шиирар Докъузпара райондин «Эренлардин сес», «Лезги газет» газетриз, «Самур» журналдиз мукьвал-мукьвал акъатзава. Адан гзаф шиирар манийриз элкъвенва. 
Абдуллаев Бренбег Шевкетович 1961-йисан 14-февралдиз Докъузпара райондин Мискискарин хуьре дидедиз хьана. Ада хуьруьн юкьван мектеб ва Дагъустандин медениятдин колледж куьтягьна. Советрин яракьлу кьушунрин жергейра къуллугъна хтайдалай кьулухъ, 1985-йисалай хуьруьн Медениятдин кlвалин директорвиле кlвалахзава. Райондин сергьятра кьиле физвай медениятдин мярекатар устадвилелди кьиле тухузва. Ам къени инсан хьиз, жегьилар патал хъсан насигьатчини я. 

Бренбег Абдуллаев

Б. Абдуллаева жегьил чlавалай ватандикай, тlебиатдикай, муьгьуьббатдикай шиирар кхьиз хьана. Икьван чlавалди адан «Зи рикlин рехъ» тlвар алай сад лагьай ктаб чапдай акъатнай. И мукьвара Махачкъалада вад виш экземплярдин кьадарда аваз чапдай акъатнавай адан «Дагъларин накъвар» тlвар алай кьвед лагьай ктабни шииррин кlватlал я. 
«Дагъларин накъвар» ктабдин редактор Зульфикъар Къафланова икl кхьизва:  «Къецеллайди йиф яз хьайитlа, адан (Б.Абдуллаеван – К.Ф.) шиирри квез экв гуда, кьуьд яз хьайитlа – чим».  
Гьакъикъатдани, адан шиирар чпихъ метлеб авайбур, кlелчидив верервирдер ийиз тадайбур ва чпикай нагьисат хкудиз жедайбур я. И гафарихъ инанмиш хьун паталди шаирдин «Багьа затlар» шиирдин са бендиниз фикир гун:

«Вилиз таквар сувабрилай, 
Гьуьрмет авун вафа я, дуст.
Эхиратдин азабрилай,
Авам хьунухь жафа я, дуст».           

«Къелемдин дустариз» шиирда икl кхьизва: 

«Лагь, кхьизвай шиирдин цlар,
Вучиз икьван яван хьурай,
Фагьум-фикир хьайила дар,
Буш гафарихъ вуч ван хьурай!?»      

Шаирдин эсерра зал адетдин кlелчидиз таниш тушир гафарни гьалтна: кьуьзуь-муьзуь, аруда, эбре, чинебалух, инсанлух, къиретсуз, пайсар, захават…  
Ихьтин гафарикай менфят къачуналди, зи фикирдалди, ада устадвилелди чlал вичиз кlанивал «къугъурзава». Им илгьамдардин лап хъсан терефрикай сад я лагьайтlа, бажагьат зун гъалатl жеда. 
Б.Абдуллаеван цlийи ктабдиз къуй кlелчийри чпи къиметни гурай, адакай лезетни хкудрай. 

Куругъли ФЕРЗАЛИЕВ

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.