Перейти к основному содержанию

Кlани руш

Барабар я ишигъ гудай электрик экверив,
Гуьрчегвилиз гекъиг жеда къизилгуьлдин цуькверив.
Рахунризни тангъах я, руш, халис билбил нуькIверив,
Гуьзел къамат наз маса гуз, зи виликай фидачни?

Къвед хьиз рекье къекъведа вун, дамах-чагъдив чилерал,
Ашукь я зун гуьзел буйдал, а ви чIулав чIарарал.
Наз гуз-наз гуз, ширинз-ширинз, рахада вун чIаларал,
Яр лагьана карагайдаз, вуна дарман идачни?

Са юкIни зур яргъивал я бурма чIулав чIарарин,
Седефри хьиз нурар гузва а ви лацу сарари.
Вахт хьайила бегьер гуда багъларавай тарари,
Вунни багъдин къелем я, руш, бес на бегьер гъидачни?

Гьамиша зун цIигел я, руш, къвед хьиз, къекъвез вун акун.
Чна кьведа дерди-гьализ, рахай гафар сир авун.
Йифди-югъди рикIе авай, дердер, гъамар ваз лугьун,
Гьа и кардиз бес са чара, яр, ви патай жедачни?

За талгьайтIан, вазни чида, кIани рушар, гадаяр,
Лифер хьтин, рахаз жеда муьгьуьббатдин савдаяр,
Гьар патахъай яна юкI-чIиб, дуьзмишариз къайдаяр,
Чи савдаяр тазабур я, чални нубат къведачни?

КIанивилин дерт залум я, йиф-югъ рикIяй акъатдач,
Гьар патахъай кIватI жеда вал, гьич санихъни алатдач.
Гьикьван гзаф къекъвейтIани, вахъ галаз зун галатдач,
Ваз и кардин эхир метлеб, бес вуч ятIа чидачни?

Гьикьван зун ваз килигайтIан, тамашунал тух жедач,
Рахан тийиз кисуналди, вун са кIус артух жедач.
Гьикьван дердер гайитІан заз, вавай закай чIух жедач,
На и кардиз гьич са фикир, са дикъетни гудачни?

На куьз гудач ви разивал, тIалаб ийир саилдиз?
Гьар тегьерда вавди рахаз, суьгьбетзавай жегьилдиз.
Зун икIа тун инсаф яни,  жаваб тагуз сефилдиз?
Бес ви пата са зеррени, инсафлувал авачни?

Чи халкьарин адет я, руш, майвайрикай къимишдай,
Гьич тахьайтIа са кIус кьванни авайдакай дадмишдай.
Атай касдин гуьгьуьл къачуз, хабар кьуна саймишдай,
Чидин нефс я темягь фидай, чна дадмиш идачни?

Лали-гегьвер, брилиантдив вун барабар язава.
Эхиримжи нефесдал кьван вун зи юлдаш язава.
Вун паталди фикирдай кьван Балакъардаш тIазава,
Заз дарман гун, Нисейхалум, ви фикирдиз къведачни?

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.