«Булах»

Булах

Алай йисан 5 августдиз Да­гъустанда туькIуьрзавай ксарин цIийи кIватIал арадиз ата­на. Адаз тIварни «Булах» ганва. Сифтедай, Интернет себеб яз са шумуд йисан виртуал алакъада авай, хайи литературадал, ярат­мишунрал кьару ватандашрин кIватIал, гуьгъуьнлай, Советское хуьре, виликан Мамрачрал, литературадин кIватIалдиз эл­къвена. Ихьтин тешкилат фадлай бейнида «чурурайди» ва ги­- ла адал чан гъайиди Урусатдин Ленинград вилаятда уьмуьрзавай гзаф агалкьунар авай ма­лим, кьегьал лезги интеллигент дишегьли Гуьзеля Гьасанова я. 
«Булахдин» межлисдиз чи зурба векилрикай сифте хабарар гузвай, милли руьгьдин даях тир «Лезги газетдин» корреспондент, журналист Нариман Ибрагьимова, шаир ва писател Шагьабудин Шабатова, композитор Къагьриман Ибрагьимов, Голландиядай хтанвай шаир Гуьлжагьан Мисриханова, лезги шииратда чпин сифте гаф лу­гьуз­вай, кьетIен хатI арадал гъизвай гелхенви Сейфудин Шагь­пазов, хъукьвави Марьям Алискерова, Советское хуьряй тир Ражадулагь Салманов, же­гьил шаир хуьрелви Владик Батманов, гьакIни межлисдин «тахсиркар», гзаф барка алай крарин «модератор» Гуьзеля Гьасанова кIватI хьанвай. Гьелбетда, ихьтин хъсан ва герек межлис раиж ийиз зани ва Кьасумхуьруьн телевиденидин кIва­­- лахдаррини иштиракна.
Вири мярекат шаддиз, руьгьдик лувар кутадай лепедаллаз кьиле фена. Хайи чилин савкьватар алай суфрадихъ жуван литературадикай, шииратдикай, чIалакай, халкьдин тIал алай са бязи месэлайрикай суьбетар фе­на. Шаирри чпин шиирарни кIелна.
Литературадин цIийи кIва­тIалди дуьнядин гьар са пипIе авай, яратмишунрал машгъул ватанэгьлияр агудда, абурукай хабарар гуда. Йиса садра Советское хуьре устад эсеррин авторар махсус премийралди къейд ийида, жегьилрик руьгь кутада, абурун яратмишунрай ктабар чапда. Гуьзеля Гьасановади ла­гьайвал: «РикIик мадни еке крар ква…»
Цийи тешкилатдикай хабар хьайи чи ватанагьлийри шадвалзава, тешкилатдин тIвар­цIихъ хуш келимаяр лугьузва, адахъ еке гележег хьун чпин мурад тирди чирзава. Жуван кагъаз за малим, алим Юсиф Халилован гафаралди акьалтIарда:
- «Булах» тIвар алай кIватIал тешкил авун чи виридан рикIяй хьана. Ада къачунвай и сифте кам мубарак хьурай. Къуй и «Булахдин» шур-шурдин ван, «Марвардин» хуш атирдихъ кваз дуьнядин вири пипIериз чукIурай!
Зани лугьузва: АМИН!

Мизам Магьмудов
"АЛАМ" журнал

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.