Перейти к основному содержанию

РикIера гел туна

М.Арзуманов

Игитди кьил агъузайтIа, 
ЛукI жеда ам кьисметдин. 
Шаирди кьил агъузайтIа, 
Бедбахтвал я миллетдин. 

Ахьтин къелемэгьлияр ава хьи, четин кьисметдин инса­нар яз, чпивай чан аламаз ктабар акъудиз тахьайтIани, абурун шиирар халкьдин меце гьатда. Халкьди абуруз икрамда. 2016-йисуз вичин дуьнья деги­шарай Медет Арзумановни гьа ихьтин шаиррикай я. Адан «ЦIун­ни вацIун арада», «Амукьда зи халкь», «Алама чал чан» хьтин шиирар лезги поэзиядал рикI алай гзаф инсанри хуралай кIел­да. Им дуьшуьшдин кар туш. М.Арзуманован поэзия дерин­вилелди, тешпигьрин иервилелди та­фа­ватлу я.
Ярар-дустарал гзаф рикI алай Медетан. Поэзиядин мярекатар тухудайла адан хвешивилин  и кьил а кьил жедачир. Са шумуд йис инлай вилик «Самур» газетдин кIвалахдарар Худата адахъ галаз гуьруьшмиш хьайила, гьикьван хвеши хьанай шаирдиз. Межлисдал вичин гьикьван хъсан шиирар кIелнай ада. Вичи лагьайвал, ибур уьмуьрди адаз бахшнавай виридалайни хъсан, рикIелай тефир легьзеяр тир.
Вичихъ чIехи агалкьунар авай М.Арзуманован эсерар Азербайжандин ва Дагъустандин газетриз, журналриз, кIватIалриз акъатна. Чан аламаз адаз кьилди ктаб акъудун кьисмет хьанач. Адан мурад шаирди вичин дуьнья дегишарайдалай кьулухъ кьилиз акъатна. Алатай йисан эхирра «Алам» журналдин редакцияди адан «РикI» тIвар ганвай шииррин ктаб чапдай акъудна. Бакудин «Азербайжан» чапханади басма авунвай и ктабдин редактор Кам­ран Аламви, сифте гаф кхьенвайди Ризван Ризван-Рин я. «Медет Арзуманован лирикадин зериф кьа­кьанвал» тIвар ганвай сифте гафуна шаирдин уьмуьрдин ре­кьикайни яратмишун­рикай ге­гьеншдиз малумат ганва. Ктабда гьакIни Риз­ван Ризван-Рин шаирдин урус чIалаз элкъуьр­навай са кьадар ши­ирар гьатнава.
Ктабдай аквазвайвал, вичиз четин­вилери гьикьван бас­рух ганатIани, Медет Арзуманов садрани руьгьдай аватнач, ада къелемдихъ галаз дуствал эхи­дал­ди давамарна. Вичин хатI, вичин махсус образар авай шаирди гзафбурун рикIера гел туна.

«САМУР» газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.