Касбубадин хкетар

КЪАЗИДИВАЙ ХАБАР ЯХЪ

Садра кимел ацукьнавай итимри Касбубадивай хабар кьуна:
- Касбуба, дуьз лагь, чи хуьре виридалайни гзаф нефсетI кас вуж я? 
Касбубади инихъ-анихъ килигна, итимрин арада ацукьнавай къазидиз ишара авуна:
- Им четин суал я, адан жаваб квез къазидивай кIан хьухь!

НИХЪ ГАЛАЗ ДЯВЕ ЖЕН?

Садра Касбубадинни къунши фекьидин аялар чеб чпихъ галаз дяве хьана. Фекьи Касбубадив дяве ийиз атана. Касбубади:
- Ви аял зи аялдихъ галаз дяве хьайила вун захъ галаз дяве ийиз атанва, вун захъ галаз дяве хьайила, бес зун нихъ галаз дяве ийиз фин? - лагьана фекьидихъ галаз кьил кьунач.

ЧIАЛАХЪ ТУШТIА ГЬИСАБА

Садра Касбубади фекьидиз:
- Вуна кьилел къведай крарни, хъсан-писдини лугьуда. Бес чи вилик квай атIа тама шумуд тар аватIа лагь тIун.
- Вуна закай ягьанатмир. Гьамни чир жедай кIвалах яни?
- Эхь, фекьи, чир жедай кIвалах я,  заз чида.
- Лагь кван.
- А тама дуьм-дуьз ви чурудал гьикьван чIарар алатIа, гьакьван тарар ава. ЧIалахъ туштIа гьисаба.

ЗАЗ РЕГЪУЬДА

Садра са девлетлу касди Касбубадив вад манат пул вугана лагьана:
- Касбуба! Вуна йикъа вад капI авурдалай кьулухъ заз дуья ая!
Касбубади и пулдикай зур манат иесидиз элкъуьр хъувуна лагьана:
- Йифер куьруь я, герек авачир рахунризни гзаф вахт физва. Аниз килигна завай пакаман купIунал къарагъиз жезвач. Гьавиляй завай пакаман купIунилай кьулухъ ийидай дуьадин пул къачуз жедач, заз регъуьда.

ЧIЕХИ-ГЪВЕЧIИВИЛИЗ КИЛИГДА

Касбуба садра фекьидиз мугьман хьана. Вилик чай гъайи вахтунда шекердин кIусар гзаф куьлуьбур яз акур Касбубади чай хъвадайла сивиз пуд-кьуд кIус вегьез хьана. Касбубадин и кар акур фекьиди адаз ихьтин суал гана: 
- Куь патара кьейибур са сура шумуд твада?
- ЧIехи-гъвечIивилиз килигда ман, я фекьи, - лагьана Касбубади гьич са карни тахьайди хьиз чай хъун давамарна.

КЪУЖАХДА КЬАДАНИ?

Са межлисда Касбуба ацукьайла, адан далу къазидихъ элкъвенваз хьана. Сада Касбубадиз лагьана:
- Касбуба, ви далу къазидихъ эл­къвенва.
- Бес за далу къужахда кьадани? - жаваб гана Касбубади.

ЕПИНАЛ ГЪУЬР ЭКIЯНАВА

Са касдиз Касбубадивай лигем яз еб кIан жеда. Ам тадиз кIвализ фена, къецел экъечIда:
- Епинал гъуьр экIянава.
- Я кас, епинал гъуьр экIяй жедай затI туш эхир.
- Лигем гуз кIан тахьайла, мад за вуч лугьун?

ГЬАРАМ ЗАТIУНИН ЭХИР 

Касбуба яшамиш жезвай куьчеда са касди гьамиша некIедиз яд яна маса гуз­вай. Касбубади адаз са  шумудра несятар ганатIани, ада япалайни авунач. 
Са юкъуз сел этана, нек гузвай касдин калер тухвана. И хабар галукьайла Касбубади адавай хабар кьуна: 
- Вун икьван пашман вучиз я?
- Сел атана, зи калер тухвана.
- Фикир авун герек туш. Гьарам затIунин эхир гьам я.

"Самур" газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.