Зун дагълариз рикIин ифин
Гун тавуна гьикI хъфида?
Ятарикай стIал-стIал
Хъун тавуна гьикI хъфида?
Алахьна гьекь, акъатна каф,
Гъилелайна бахтавар чIаф.
И кукIушра кьве рикIин гаф
Тун тавуна гьикI хъфида?
КIватIна гъиле рекьерин чIил1 ,
Чигед виле амукьна вил,
Шагьдин хурал шиирдин гъил
Кьун тавуна гьикI хъфида?
Дагъ лагьана рехъ атIай кас,
РикI алахьна, руьгь ацIай кас,
Са таватди рикI атIай кас
Кун тавуна гьикI хъфида?
Рубрика
Добавить комментарий