РикIелай тефир мярекат

РикIелай тефир мярекат

Эдебиятдал рикI алай ксари чпин уьмуьрда садра хьайитIани халкьдин арада тIвар-ван авай шаир акун ва адав кьве келима рахун чIехи бахтунай гьисабда. Гьа ихьтин гуьруьшдихъ цIигел тир студентрин теклифдалди Дагъустандин Гьукуматдин Университетдин филологиядин факультетдиз лезги халкьдин рикI алай чIалан устад, шаир Седакъет Керимова мугьман хьана.
Шаир мукьувай акуни студентриз таъсирна, гуьруьшди абурук руьгь кутуна. 
Сифте гаф университетдин профессор, литературовед, фольклорист Гьажи Гашарова къачуна. Алимди С.Керимовадин лезги, урус ва азербайжан чIаларал къадалай гзаф шииррин кIватIалар, прозадин ктабар чап хьанвайди ва ада чи милли эдебиятда чIехи чка кьунвайди къейдна.
Ахпа Гьажи муаллимди гаф мугьмандиз гана. Шаирди вичин уьмуьрдикай, шииратдиз атуникай ва вичин кьисметдиз акъатай четинвилерикай марагълу ихтилатар авуна. Ада вичиз гайи вири суалриз михьи лезги чIалан верцIивал хвена жавабар гана. 
Жегьилрин чирвал мадни артух хьун паталди Гьажи Гашарова мугьмандивай 20 йисуз ара датIана Бакуда акъудзавай «Самур» газетдин гьаларикай, гьакIни «Сувар» ансамбль гьикI хьана арадал атайди ятIа ихтилат авун тIалабна.
Шаирди гзаф марагълу, рикIин деринра гьатдай жавабар гана. 4-курсунин студентка Марина Ибрагьимовади С.Керимовадин «Чун лекьер я» тIвар алай шиир фасагьатдаказ кIелна ва авторди адан тIалабуналди а шиир гьикI арадал атанатIа ихтилатна.
Гуьруьшдиз жегьил алим, филологиядин илимрин кандидат, доцент Наида Султанмурадовадини атанвай. Мярекат кьиле физвайдакай хабар хьана атай РАН-дин ДНЦ-дин къуллугъчи, филологиядин илимрин доктор Фаида Гъаниевади шаирдин къелемдикай хкатнавай эсерриз чIехи къимет гана ва ихьтин гуьруьш кьиле фини чи милли эдебиятдин хийирдиз къуллугъзавайди къейдна.
Мярекат чIалал ва эдебиятдал машгъул тир филологриз пак тир шегьре рехъ жагъуруниз, руьгьда лезгивал хуьниз, бубайрин ирсинин ирссагьибар хьуниз ва адетриз датIана вафалувал хуьниз хас тир насигьатралди, меслятралди тафаватлу хьана.
Кьве сятдин къене кьиле фейи гуьруьш и цIарарин авторди филологиядин факультетдин студентрин «гьарайдиз» гьай гана, яргъал мензилар атIана мугьман хьайи шаирдиз пара кьадар сагърай лугьуналди ва профессор Гьажи Гашарова гележегда ихьтин гуьруьшар мадни хъжедайди къейд авунуналди кьилиз акъатна.

Владик БАТМАНОВ, 
Дагъустандин Гьукуматдин Университетдин филологиядин факультетдин 4-курсунин студент
"Самур" газет

Рубрика

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.