Aялриз хвеши жеда

И йи­къара «Азер­бай­жан» чапханади Се­дакъет Кери­мо­вадин ая­лар патал кхьенвай мад са ктаб чап­дай акъуднава. «Леян мани» тIвар ганвай и ктабда ирид мах гьатнава. Абур гьайванрикай, къушарикай ва набататрикай туькIуьр­навай махар я.
Адет тирвал, гьайван­рикай туькIуьрнавай халкь­­дин махара гзаф дуьшуьшра гьалтзавай вакъиаяр акьулди четин кьатIудайбур, суьгьуьр квайбур жеда. Абур вири патарихъай хиялар гзаф, гьакъикъи яшайиш тIимил кваз туькIуьрда. Им халкьдин махарин синих туш, абурун кьетIенвал я. 
Халкьдин махарилай тавафатлу яз С.Керимовади кхьенвай махарик квай крар, вакъиаяр акьулди хъсан­диз кьатIудайбур, гьакъикъатда жедайбур я. Гьавиляй алакьунар авай кIекIедиз тамун къушари къалурай къайгъусузвили, маса гьайванри вичиз кеждиз килигзаватIани, Филин тIвар алай филдин баладин къенивили, адан масабуруз куь­мек гуни, Зузи лугьудай тутукъушдин кстахвилери, Савган лакIаб алай кицIи гъвечIи Селеяз къалурай вафалувили, кIанивилихъни вафалувилихъ ялзавай Лей ва Дан тIвар алай къугъарин вакъиади кIелдайбурув кIевелай фагьумиз тазва. 
Ктабда гьатнавай ма­хара сев­рен ва жа­навурдин векъивал, пехъ­рен пехилвал, липI­­липIрин футва­чи­вал, жегьил тарарин хиянаткарвал къалурзавай кхьи­рагди, гьа са вахтунда аялриз умун­вални кIанивал, къенивални кьегьалвал, къайгъударвални дуст­вал кIанарзава. Ада къелемдиз къачунвай образар рикIел ала­мукьдайбур я. 
Лезги халкьдин махара хьиз, инани аялриз тербия гунин метлеб ава. Гьа и жигьетди ктабдин къиметлувал генани артухарзава. Гьахълувал, адалат, мердвал, гьакъикъи дуствал вяз ийизвай и махар гъвечIи-чIехи талана вири кIелза­вайбурун рикIяй хабар гузвайбур я ва гьавиляй С.Ке­римо­вадин и ктабни гъиляй-гъилиз фидайди хьанва.
ЦIийи ктабдин кьетIенви­лерикай сад ам я хьи, вири махар кутугай иер шикил­ралди тама­марнава. И иер шикилар чIугун­вайди лагьайтIа, автордин хтул, Бакудин 27-нумрадин мек­тебдин 4-синифда кIелзавай, вичин 10 яшар хьанвай Садия Насруллаева я. И гъвечIи ру­шан алакьунрал ада чIугунвай шикилар акурла вири гьейран жезва. Гьавиляй и ктаб паталди пешекарри чIугур шикилрикай хуш татай авторди Садиядин шикилрикай менфят къачунва. 

«САМУР» газет