Перейти к основному содержанию

РикIера амукьда

Медет Судябеган хва Арзуманов

19-июндиз алакьунар авай шаир, лезги поэзияда вичин рехъ, хатI, гел авай Медет Судябеган хва Арзуманова яргъал чIугур начагъвал себеб яз вичин дуьня дигишарна. 
Медет Арзуманов 1951-йисуз Манкъулидхуьре дидедиз хьана. Хуьруьн юкьван мектеб куьтягьна жуьреба-жуьре майишатра кIвалахай Медет Арзуманова уьмуьрдин саки чIехи паюна Худат шегьерда яшамишна   и макандин културадин, литературадин мярекатрик активдаказ къуьн кутуна.
Медет гьеле мектебда амаз шиирар теснифдай. «РикIин гаф», «Марвар» литературадин кIватIалра иштирак авур заридин эсерар лезги газетриз ва журналриз («КцIар-Къусар»,"Лезги газет", "Шарвили", "РикIин гаф", "Самур", «Алам»,  «Чирагъ» ва мсб.) акъатна. Адан шиирар Бакуда ва Магьачкъалада басма хьайи алманахрикни акатнава. 
Медета хайи чIалан мумкинвилерикай, иервиликай, поэтиквиликай менфят къачуна кхьенвай эсерар поэзиядин асул чешнеяр гьисабиз жеда. Шаирдин поэзияда са чIехи тIал авай. Тек вичин ваъ, чи къалабулух галай дуьнядин, кат-галтугда авай инсанрин тIал. Эхир вахтара кхьей шиирар саки вири кьиникьинин философиядиз талукьбур я. 
Шаир кIелзавайдан рикIел тахьайла, къимет такурла, эл адан эсеррихъ цIигел тахьайла, амач лагьай чIал я. Медет муаллим, Куьн датIана чи рикIера амукьда.  «Алам» журналди чапдиз гьазурнавай ви сифте улуб гъилерай-гъилериз фидайдал чIалахъ я чун. Вучиз лагьайIа, а шиирар архивра, сандухра тун патал ваъ, рикIериз экв, чим гун патал я. 
Шаир хуьруьнвийрин, ярар-дустарин иштиракдалди хайи Манкъулид хуьре кучудна. Аллагьди рагьмет авурай.

Амукьда

Залай къулухъ и дуьняда
Зур кхьенвай чар амукьда.
Ажалди заз гудач мажал, 
ЗуракI хьайи цIар амукьда.

И гафарин куьн хьухь чIалахъ,
За физ вичел авур дамах, 
ЦIийи свас хьиз наз гвай булах,
Яд кьурана тIвар амукьда.

РикIеваз и дердерин тагъ, 
Зи гъам чIугваз цIрада рагъ.
Я пер хайи кьил рехи дагъ,
Вални агьу-зар амукьда.

КутIундайла кафандин кьил,
Ахъай тежез зи къанвай гъил,
Са туьмердихъ галамай вил 
Киф атlанвай яр амукьда. 

Ярар-дустар
Кцlар газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.