Куьредин ярар

Алатай йисуз СтIал Сулейманан райондин вири Кьиблепатан Дагъустандиз сейли «Куьредин ярар» медениятдин макандин 25 йис тамам хьана. 1990-йисан 25-январдиз халкьдин депутатрин райсоветдин талукь къарардалди арадиз атай ада лезги чIал, эдебият, харусенят, тарих чирунин, вилик тухунин, теблигъ авунин кардик лайихлу пай кутуна.
И медениятдин макан арадал гъун патал сифте кам къачурди, адан устав ва программа туькIуьрайди, адаз сифте яз регьбервал гайиди чи къелемэгьли Нажмудин Шихнабиев я. Адан теклифдалди «Куьредин ярарин» комитет тешкилна ва аниз халкьдин патай гьуьрмет къазанмишнавай Абдулбари Магьмудов, Нажмудин Шихнабиев, Сажидин Саидгьасанов, Агьмедпаша Агьмедпашаев, Абдурагьман Межидов, Шагьабудин Шабатов, Абидин Камилов хьтин къелемэгьлияр ва гьевескар композитор Майина Абдулмуталибова хкяна. 1990-йисан эхирдай комитетдин седривиле Агьмедпаша Агьмедпашаев хкяна.
Алатай 25 йисан къене «Куьредин ярари» районда гзаф лайихлу крар кьилиз акъудна. И медениятдин маканди къарардиз къачур чIехи пай месэлаяр кьилиз акъатна: аслу тушир «Куьредин ярар» газет, бюллетенар чапдай акъудна. 2015-йисан январдилай «Куьредин ярар» журнал акъудзава. Шаир Алибег Фетягьоваз гуьмбет эцигунин месэла къарагъарна ва ам кьилиз акъатна. СтIал Мусаибакай ва Балакъардаш Султановакай ктабар халкьдал агакьарна. Яратмишзавай ксарин 80-далай алатна ктабар акъудна ва икI мад.
Алай вахтунда «Куьредин ярари» 70-далай гзаф къелемэгьлияр агуднава. РикI шадардай кIвалах ам я хьи, ада Хив, Мегьарамдхуьр, Кьурагь, Докъузпара районрин яратмишдай ксарихъ галазни ала­къаяр мягькемарзава, абу­рун ктабар чапдиз гьазурзава ва маса куь­мекарни гузва. 
Гила медениятдин маканди цIийи кIва­ла­хар гъиле кьунва: Къун­­ши районра «Куь­­­редин ярарин» ин­формациядин пос­тар тешкилзава, мек­­тебриз лазим тир ктабар, стендар, лезги зарийрин портретар гьазуриз куьмек гузва, абур гафарганралди, чи къелемэгьлийрин ктабралди таъминарзава. Алай йисуз чара-чара авторрин са шумуд ктаб чапдай акъудда, милли суварар, конкурсар, юбилеяр кьиле тухунин кIвалах давамарда. 
Чи милли меденият ва эдебият вилик тухуник пай кутазвай «Куьредин ярарин» виридалайни чIехи къуллугъ ам я хьи, ада райондин агьалияр гъвечIи чIавалай бубайрин адетрал амал ийидайбур яз, жуван чIалан къадир чидайбур яз, шииратдал, кIел-кхьинал рикI алайбур яз чIехи хьуниз куьмек гузва
P.S. Лезги халкьдиз намуслувилелди къуллугъ авунай, илим, милли эдебият, меденият вилик тухунин кардик кьетIен пай кутунай Седакъет Керимовадиз «Лезги халкьдин къагьриман руш» ва Муьзеффер Меликмамедоваз «Лезги халкьдин къагьриман хва» гьуьрметдин тIварар гайи «Куьредин ярар» медениятдин макандин комитетдин ва Лезги Кхьирагрин КIватIалдин райондин отделдин тIварцIелай Агьмедпаша Агьмедпашаева чи къелемэгьлийрив дипломар вугана.

"САМУР" газет