Перейти к основному содержанию

Кьисасдин элегия

Зун ракъурна вуна чиляй чилериз,
Лагьана: "Вун тахкурай зи вилериз" 
Арадал затI алачиз зав къал хьана.
Гьа ви вилик заз фир-тефир сал хьана.
Мад вун галай патахъдин элкъведач, 
Гьа вун авай хуьруьзни зун хуькведач.
Зун элкъвена хъфида куь варцелай, 
Гьаналламаз ракъурна вун рикIелай.
Белки икI жен... Акъваз акъваз, яб це заз, 
Вилер ахъаз зун вилик кваз ваз такваз, 
Ви писвиляй, мурдарвиляй жен ваз гуж,
Ирид югъ жен тIвар атана "Буьркьуь руш". 
Духтуррал физ, дарман тежез хуьквен вун,
Жерягьрикай фарман тежез къекъвен вун.
ЦIеф цIурурин, элкъуьрин вал кьелерни,
Гумни кухтан кана самун цуьлерни.
Зияратар, пIирер, шейхер, Эренлар,
Дарман тежен Дербентдавай Къирхлер.
Вилаятда тефей чка тамукьин, 
Чара тежез, дава тежез амукьин...

Панагь жен ваз яргъай атай къарачи,
Чими хъийиз серин хьанвай ара чи. 
Къарачиди лугьун ваз:" Са негъениз
Рекье гьат вун къунши хуьруьз- Гелхениз. 
Са кас ава вине кьазвай намус- дин,
ТIварни язва, шак алачиз, Сейфудин.
Гьада гайтIа ви кьве вилиз кьве темен, 
Экв хкведа, ахквада ваз денбеден

"КичIез-регъуьз кьуна бахдин хъуьчIуькай,
Вун чи варцел къвен вядеда мичIи хьай.
Чанда авай а хъелдин цIай квадарна,
За жува-жув ви къужахдиз гадардай.
За кьве темен гудай куз-куз вилериз,
Пуд мад гудай:сад кIуфуз кьвед хъуькъвериз.

Ирид къалай шадвал ахкур веледдин,
Ван жен зазни ви дидедин минетдин:
"РикI алай руш ви гьуьрметриз хас хьурай,
Вун зи езне, зи бала ваз свас хьурай"
"Хутах ви руш, тахкурай зи вилериз".
Ван хьайила вун фин чиляй-чилериз.

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.