Завод амач, я кархана,
И кар акваз рикI тIар хьана.
Лагь, им гьихьтин къе кар хьана?
Чахъ Лезгистан уьлкве аваз.
Зи азиз тир, зи халкь лезги,
Килиг жуваз, кьуна гуьзгуь.
Вуч ава кьван, лагь, чахъ уьскуьг?
Чахъ Лезгистан уьлкве аваз.
Вири ава зи ватанда,
Генг хьана кIан туш патандаз.
Лугьуз жедан гьал хъсанда?
Чахъ Лезгистан уьлкве аваз.
Уьтквем хваяр, зирек, кьегьал,
Вучиз абур хьанва бейгьал.
Себеб вуч я атун и къал?
Чахъ Лезгистан уьлкве аваз.
Туна къулав пабни аял,
РикIе гьатна агъзур хиял,
Гъурбатдава лезги магьал,
Чахъ Лезгистан уьлкве аваз.
Лезгийрик садни квач авам,
Вилик экечI тIун са тамамд!.
Мусалди икI хьурай давам,
Чахъ Лезгистан уьлкве аваз?
Рубрика
Добавить комментарий