Къеле шегьер

Ажайиб вун ава наз гуз,
Дамахдивди къадим шегьер,
Кархана, хуьр, девлетрин жуз,
Мад ахцIуриз, гуз чаз бегьер.
Са пад - дагълар, са пад ви - гьуьл,
Дуьзен чуьллер, багълар уьзуьмд...
Ви мискIинрал рахаз билбил,
Навруз юкъуз ацIанва ким.
Гъилин хатI я ви акунар,
Къелеярни, авай тарих,
Гьуьлуьн къерех, дигмишна нар,
Лайихлу я ийиз тариф.
Кьве агъзур йис хьана яшар,
Гьич садазни кIирнач гардан,
Бедбахтвилихъ элкъвейла шар,
Душманд хура цIурна гьулдан.
Гзаф гана азабар ваз,
Гьуьл ялаври кьурла ргаз,
ЦIаярикай хкудай саз,
Дагъустандин икрам я ваз.
Цуьк ахъая даим машгьур,
Дербент къадим, къеле шегьер,
РикIин сидкьи, авай хатур,
Чи миллетдин дибдин шегьер.