Перейти к основному содержанию

Кьери жезва

Нубатдалди йисар физва тарихдиз,
Кьери жезва ветеранрин жергеяр.
ЯтIан тахсир артух я чи къилихдиз,
Гъамуни кьазва чи фикиррин мезреяр.
Кьиле тухуз хиве кьур гаф тубадин,
Цуькверни гваз обелискдал атана.
Дуьа ийиз руьгьдиз чIехи бубадин,
ТIвар гвай хтул яргъал мензил  атIана.
Европадин шумуд уьлквед  чIурарал
Чка хьанва Дагъустандин  рухвайриз.
Шумуд неве, цуьк эцигиз сурарал,
Физва худ гуз чпин вилин накъвариз.
Гьикьван жегьил чанар тергна дяведи,
Гьикьван экуь мурадар терг авуна.
Гьикьван сусар ширна залум дяведи,
Гьикьван каш, мекь чи инсанриз акуна.
Сталинград! Ви Кургандин кукIвалай
Гьарайдин севт гьатзава зи япара.
Эверзавай дидедин сес сураллай,
Ван къведайвал элдиз авай яргъара.
Ленинграддин зулуматдин кIуьд виш югъ
Дуьньядал эл къарсатмишай кар хьана.
Халкьдин ажугъ чапхунчийриз  хьана югъ,
Тарихдал лап къизилверекь зар хьана.
Шегьердикай хьана бегьем гурхана,
Зулумкаррихъ зерре инсаф тахьана.
Шумуд диндин миллетдиз ам сур  хьана,
Ватан патал чанар гьайиф татана.

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.