Перейти к основному содержанию

Пуд пипIен чар

Бириш авай гъилер зурзаз,
Кьватидай чар акъудна.
Зайиф хьанвай тупIарив кьаз,
Ам пIузаррив агудна.
Вилин накъвар стIал-стIал
Хурудал кьван авахьиз,
Чуьнуьхиз кIанз рикIевай тIал,
Ихтилат- дерт алахьиз.
Хъипи хьанвай пуд пипIен чар
Аладарна явашдиз,
Суьгьбетзава кIелиз гьар цIар,
Хтулриз гагь тамашиз:
“Ракъурзава салам-дуьа,
Эвелдай за виридаз.
Четинди я залум дяве,
Хайи Ватан кIанидаз.
Гужлу яракь гваз атана
Къирмишзава хуьр, шегьер.
Халкьдин иви хъваз атана
Илан-залум тух тежер.
Чаз кичIе туш. Иландин кьил
Пуьрчуькьарда эхирни.
Пехъи кицIин хада гуьгьуьл,
Тадач адан липирни.
И кар патал, гьулданд кIаш хьиз,
СССР-дин халкь ава.
Чи Ватандиз Гъалибвал гъиз,
Чахъ Аллагьдин гьахъ гала.
ГъвечIизамаз зи кьуд бала,
Зун дяведиз атанва,
Алатдалди чIехи бала,
Чир хьухь, ина акIанва.
Веси я ваз: зи балаяр
Намус аваз чIехи хьуй.
Тахьуй абруз гьич хатаяр,
Патриотар хьурай, къуй.
Ватандилай гьич ширин затI
Авачирди чиз хьурай,
Чешне хьурай абурун зат,
Баркаллаяр гъиз хьурай”.
Эхиримжи чар хьана им
ЧIехи бубад кхьей чаз.
Ам хуьх куьне кIвале даим,
Аманат я. Руьгь амаз
Гьиссда куьне атабадин,
Сувариз кьван хьуй кIелиз.
Весидинд я гаф тубадин,
Адан мурад фий кьилиз.
КIвализ хквер хьанач муьгьлет,
Ватан патал чан гана.
Агъур хьана адан кьисмет,
Ажалд вилик ян ганач.
Хъипи хьана бириш аваз
Чи бадедин гъилер хьиз.
Пуд пипIен чар гъилера кьаз,
Куьгьне хьана бижгъер хьиз.
КIватI хъувуна кьватидаваз
Ам сундухда хтуна.
Хтулриз мад бадедин
Вилел накъвар акуна.

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.