Перейти к основному содержанию

“Шарвили” - школада

Хайи литературадин тарсара аялриз материал чирун патал муаллимривай чпин кIвалахда методикадин цIийи къайдаяр, техникадин такьатар ва Интернет ишлемишун истемишзава. ЦIийи къайдайри цIийи жуьредин тарсарни арадал гъизва. Ихьтин тарсар Сулейман-Стальский райондин Герейханован хуьруьн 1-нумрадин юкьван мектебда фадлай кIвалахзавай кьилин категориядин муаллим, РФ-дин Президентдин грантдин сагьиб Сегьерханум Рашидовна ОСМАНОВАДИН тежрибада гзаф дуьшуьш жезва.
Ада муаллимар патал “Лезги литературада Етим Эминан яратмишунар чирдай тарсар”, “Гьаким Къурбанан эсеррай адетдинбур тушир тарсар”, “Школада Мердали Жалилован “Фу” поэма чирун” ктабар акъуднава. Лезги чIаланни литературадин муаллимри адан тежрибадикай менфят къачузва. Алай вахтунда Сегьерханум Рашидовнади муаллимар патал “Школада “Шарвили” эпос чирун” ктаб акъуднава.
Лезги литературадин программада VII классда аялриз халкьдин мецин эсерар чирун патал 6 сят ганва. Абурукай 4 сят - “Къванцин гада” ва 2 - сят “Шарвили” эпосдиз. Саки 20 манидикай ибарат тир “Шарвили” эпосдин мана-метлеб ачухарун патал 2 тарс тIимил я. С.Р.Османовадин ктабди и месэла регьятдиз гьялиз куьмек гузва. Ам лезги чIаланни литературадин муаллим Р.А.Алиметовади кхьенвай сифте гафуникай, “Шарвили” эпос чирунин мана-метлебдикай, эпосдин гьар са махуниз ганвай баянрикай, Дагъустан Республикадин лайихлу муаллим Ж.Н.Жамалова “Шарвили” эпосдай тухвай тарсмярекатдиз гайи къиметдикай ва ишлемишай ктабрин сиягьдикай ибарат хьанва.
Авторди жегьил муаллимриз метлеблу меслятар гузва, хийирлу рекьер къалурзава. Ада вичин тарсара Шарвилидикай шиирар манидалди лугьузва, шиирар туькIуьрзава. Ихьтин алакьунар чаз Сегьерханум Рашидовнади кхьенвай ктабрайни аквазва. Шарвилидикай ада кхьизва:
Эхь! Шарвили чи кьегьал я,
Ам чи руьгьдин даях я!
Лезгистандин панагь хьайи
Лезги халкьдин дамах я!
Авторди гьар са тарс жуьреба-жуьре амалралди гегьеншарзава, абур дерин чирвилер гудайбур, машгъулатдинбур ва инсанпересвилин тербия квайбур жезва.
Сегьерханум Рашидовнади тарсара ТСО-дикай ва компьютеррикай, литературадин илимдикай, тарихдикай гегьеншдиз менфят къачузва. Чна умуд кутазва, Сегьерханум Рашидовна Османовадин цIийи ктабдикай гьар са муаллимдиз вичин кIвалахда еке куьмек жеда.

Жаклина МЕЙЛАНОВА,
Педагогикадин институтдин илимдин къуллугъчи
Лезги газет

Рубрика

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.