Бахт

Бахт лугьудай са затI ава дуьньяда,
Авач лугьуз, инсан хъел кваз  рахада.
Экуь вилер, хци рикIер, сагъ гъилер -
Гьам бахт я ман, килиг, къачу, я эллер!
КIан жемир бахт, нелай ятIа алатай,
КIан жемир бахт, нивай ятIа аватай,
Килиг вилик, килиг кьулухъ - бахт ава,
Ам къачудай гьар са жуьре вахт ава.
Бахт гъилик ква, ви вилик ква, килиг вун,
Ачух вилер, килиг, гъилер ахъая!
Къвазмир къвалахъ, ша хьухь уях, вилик хьухь!
Вун бахтуниз гьар патахъай мукьва я.
Чир хьухь жуван хизан, арха,  хайибур,
Хайи къалай вун арадал гъайибур,
Кьуна вири, жуван рикIив агудна,
Бахтунин гъед экуь цавуз акъудна!
Къе чи Ватан авадан я, жанлу я
Чунни вири адахъ галаз бахтлу я.
Адан гьар са чIиб бахтунин лишан я,
Ам Аллагьди ваз ганавай сагъ чан я!