Зи халкь - зи девлет

Зи халкь патал гьазур я зун
Вегьез вилик къадамар.
Зи халкь патал гьазур я зун
Гьайиф текъвез шаламар.

Зи халкь патал гьазур я зун
Кутаз цIийи булахар.
Халкь патал я, гьазур я зун
Ийиз ферлу кIвалахар.

Багьа я заз лезги чилин
Яйлахарни къишлахар,
Багьа я заз ризкьи чилин, -
Чи хьрарни чанахар.

Зи халкьдин рехъ ийиз куьруь
КIанзавайбур ацIанва.
Лезгидин ягь жедач къуьруь,
Ам ватандихъ галкIанва.

Сергьятривай къегьат ийиз
Жедач лезги майданар.
Чна, сабур кьенят ийиз,
Хада вири зинданар.

Ягъиз тадач лезги ризкьи
Чна гъейри сафунай!
Акъвазда чун, гьар са лезги,
Жуван михьи гафунал...