Фагьумнамаз бязи межлис

Фагьумнамаз бязи межлис, 
Анал акъвазун хъсан туш. 
Жуваз лазим тушир силис - 
дин гафар жузун хъсан туш.

Нубатсуз чIаларал рахаз 
КIан жемир ваз, - секинз акъваз. 
Загьирда ви вилер ахъаз, 
БатIинда ксун хъсан туш.

Эй фекъир, вун тежен наши, 
Вилер буьркьуь, япар биши. 
Эвел тIвар эхцигна къучи, 
Гуьгъуьнлай зурзун хъсан туш.

Фагьума дуьньядин гьалар, 
Бязи инсанрин хиялар. 
Туна чанда кьуру ялар, 
Жува жув къазун хъсан туш.

Ахмакьвилик квай азарар 
Чир тахьун я хийир, зарар. 
Эвел михьи тир пIузарар 
Гуьгъуьнлай кьацIун хъсан туш.

Яргъи гафарикай вучда? 
Эхир гьатда кьил кьурушда. 
Жуван кIвачера арушда - 
Фитне арасун хъсан туш.

Гьар гьи касди ийиз зулум, 
Эхир вичяй акъатда гум. 
Зи акьулдив, фитнедин тум 
Жуван сала цун хъсан туш.

Ша межер вун акьван лавгъа. 
Мус чир хьуй ваз ериш, яргъа? 
Эхир кьил акьада чарха - 
Гьич келле ацIун хъсан туш.

Эй фекъир дили - дивана, 
Иер фагьум ая вуна. 
Дуьз лугьуда Сулеймана:
Масдан тIуб кIасун хъсан туш.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.