Эй юлдашар, жемир гъафил

Эй юлдашар, жемир гъафил! 
Ахварай аватун хьсан я.
Дад, юлдаш, на ахъая вил, 
Гъавурда гьатун хъсан я.

Душмандин кеф саз ийидай, 
Дерди гьам галаз ийидай, 
Дустуниз гъараз ийидай, 
Хажалат жуваз ийидай, 
Ахмакь кьил гатун хъсан я.

Куьгьне фикир, а хиялар, 
Герек амач чаз а гьалар. 
Яшамиш хьуй комсомалар, 
Чи властдин къелед цлар 
Мягькемриз гатlyн хъсан я.

Чи межлисдиз тушир ухшар 
Кулакариз вегь лaпlaшap, 
Хаинрал илиг а лашар. 
ГьинаватIан чи юлдашар 
Калхуздиз кIватIун хъсан я.

ТакIан душмандив адават, 
Гьелбет, хьунухь я чи ният. 
Жем авуна жуван къуват, 
Туна чанда пapa гъейрат, 
Гъейратдив фу тIуьн хъсан я.

Лежбер юлдаш, жемир лепеш, 
Вегь кьуьгъверал вуна ви леш.
Агакьда зул, авахьда пеш, 
Тади гьалда, тийиз эглеш, 
Тум чилик кутун хъсан я.

Авамдаз кар чириз рахух, 
Тун тавурай кеспи кьулухъ. 
Йигинвилел вилик агъугъ, 
И малдарвал ая артух. 
ГьакI гьерекатун хъсан я.

Кесибарин экуьникай, 
Гьар са кар чи туькIуьникай, 
Чи газ фанар куькIуьникай, 
Чи советдин луькIуьникай 
Жува затI кьатIун хъсан я.

СтIал Сулейман фугъара, 
Гьал яваш я бязи къара. 
Куьгьне душманривай ара 
Яргъал къакъатун хъсан я.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.